Sirag 49 - Papiamentu Bible with DC 2013(PBDC13)

Rei Yosías

1Nòmber di Yosías ta manera sensia aromátiko

prepará pa un trahadó di perfume eksperto;

su rekuerdo ta dushi manera miel

òf manera muzik na un bankete.

2El a duna e pueblo un bon ehèmpel pa nan kombertí

i a destruí e detestabel diosnan falsu.

3El a duna Señor su kurason,

i den tempu di piká el a keda deboto.

Delaster reinan di Huda i profeta Yeremías

4Ku eksepshon di David, Ezekías i Yosías,

tur e otro reinan di Huda a hiba un mal bida

i nan a bandoná lei di Altísimo.

E ora ei fiesta a kaba pa e reinan di Huda.

5Nan a entregá nan poder na otronan

i a duna un pueblo strañero nan gloria.

6E enemigu a sende e siudat skohí,

kaminda santuario tabata, na kandela

i hasi su kayanan bashí

manera Yeremías a pronostiká.

7E pueblo a maltratá Yeremías,

esun ku for di den skochi di su mama

tabata konsagrá profeta,

pa ranka, kibra, destruí i tumba,

pero tambe pa konstruí i planta.Ezekiel

8Den un vishon Ezekiel a mira Gloria di Señor,

ku Señor a mustr'é riba e garoshi di e kerubinnan.

9Señor a laga áwaseru duru yobe riba su enemigunan.

Señor a mustra bondat na esnan ku tabata kana den bon kaminda.

Profetanan menor

10Awor e diesdos profetanan!

Stèk nobo spreit for di nan restunan!

Pasobra nan a kurashá pueblo di Yakob

i a salb'é pa medio di nan speransa firme.

Despues di eksilio

11Kon nos lo por kanta gloria di Zerubabel?

E tabata manera un renchi di seyo na man drechi.

12Meskos ku Yeshua, yu di Yosadak!

Ten 'i nan ten nan a traha e altá

i konstruí e tèmpel konsagrá na Señor

i destiná pa su gloria eterno.

13Den nos memoria ta biba prinsipalmente Nehemías,

ku a bolbe lanta e murayanan ku a kai,

ku den nan a pone porta ku tranka

i a rekonstruí nos kasnan.

Esnan mas grandi bou di hende

14Dios no a traha niun hende riba mundu meskos ku Henok,

pasobra El a kit'é for di riba mundu.

15Tampoko no tabatin niun hende manera Jozef,

pero den kreashon, riba tur kos ku tin bida Adam ta pará.