Judit 16 - Papiamentu Bible with DC 2013(PBDC13)

Kanto di alabansa di Judit

1Laga tamburein zona pa Dios,

bati platío pa Señor,

kanta salmo i himno di alabansa p'E,

alsa i invoká su nòmber.

2Señor ta un Dios ku ta kaba ku guera,

El a libra mi di man di enemigu,

trese mi sano i salvo serka su pueblo.

3Asirionan a baha for di serunan den nort,

nan a bini ku míles di sòldá,

na gran kantidat nan a inundá e vayenan,

nan kabainan a kubri e seritunan.

4Nan a menasá di kima mi pais,

mata mi muchanan ku spada,

dal mi yunan na lechi spat kontra suela,

kohe mi muchanan prezu

i bai ku mi hobensitanan.

5Pero Señor Todopoderoso

a usa un muhé

pa pone nan frakasá.

6Nan héroe no a kai

na man di un yònkuman

ni n' ta e héroenan di antaño

a dal e mata;

ni ta gigantenan enorme a kai riba dje;

ta Judit, yu di Merari,

a paralis'é ku su kara bunita!

7Judit a kita su paña di rou

pa bai salba Israel oprimí,

el a perfumá su kara,

8mara su kabei ku pèrla,

bisti paña bunita

pa sedusié.

9Sandalia di Judit a blèndu Holoferne su wowo;

beyesa di Judit a hòrta su kurason;

sabla a kap su kabes afó.

10Su brio a spanta e hendenan di Persia,

su kurashi a pone e hendenan di Media tembla.

11E ora ei mi pueblo oprimí

a dal un gritu i e enemigu a spanta,

mi pueblo débil a grita

i e enemigunan a tembla, haña kalafriu,

mi pueblo a alsa bos i e enemigu a hui bai.

12Yunan di katibunan muhé a heridá nan,

mata esnan ku a hui bai.

Den bataya ku Señor nan a muri.

13Mi ta bai kanta un kanto nobo

15Serunan ta sakudí te den nan fundeshi,

bira un ku laman,

barankanan ta dirti manera was Bo dilanti;

pero esnan ku honra Bo, Bo ta mustra bo bondat.

16E sakrifisionan di holó dushi nada nan n' ta bal.

E vèt kimá komo sakrifisio di kandela nada e n' ta nifiká.

Pero esun ku honra Señor, semper lo ta grandi.

17Ai di e nashonnan ku ta menasá mi pueblo:

Señor Todopoderoso ta kastigá nan dia di huisio;

E ta entregá nan na kandela i bichi,

i yora nan lo yora di doló eternamente!

Delaster presentashon di Judit

18Ora nan a yega Herusalèm, nan a alabá Dios i ora e pueblo tabata purifiká, nan a ofresé sakrifisio di kandela, donashon boluntario i regalo.

19Judit a konsagrá na Dios tur propiedat di Holoferne ku e pueblo a dun'é. Tambe e muskitero ku e mes a trese for di kamber di Holoferne.

20E pueblo a keda fiesta durante tres luna dilanti di tèmpel na Herusalèm i Judit a keda huntu ku nan.

Fin

21Despues di e dianan ei tur hende a bai nan lugá bèk, Judit a bai Betülua i a keda biba na su propiedat. Durante su bida e tabatin fama den henter pais.

22Tabatin hopi hende ku ker a kasa kuné, pero e no a kasa nunka mas despues ku su kasá Manase a muri i bai sosegá serka su antepasadonan.

23El a alkansá e edat altu di 105 aña, bibando den kas di su kasá. Judit a duna su kriá su libertat. Judit a muri na Betülua i nan a der'é den e kueba kaminda a dera su kasá Manase tambe.

24E pueblo a tene rou shete dia largu p'e. Promé ku su morto el a parti su propiedat pa e famianan mas yegá di su kasá Manase i pa esnan mas yegá di e mes.

25Durante e tempu ku Judit tabata na bida i tambe basta tempu despues di su morto ningun hende no a hinka miedu den Israel.