Job 15 - Papiamentu Bible with DC 2013(PBDC13)

Di dos diskushon entre Job i su amigunanElifaz ta skual Job pasobra Job ta insistí ku e ta inosente

1E ora ei Elifaz di Teman a rospondé:

2‘Job, akaso un hòmber ku sabiduria

ta ras pa loko,

i ta iritá hende

manera bientu kayente di ost?

3Niun hende sabí no ta argumentá

ku palabra bashí,

ku diskursonan sin balor.

4Pero abo ta hasi pió ainda,

bo tin menoskousa pa temor di Dios

i ta bagatelisá deboshon p'E.

5Bo piká ta hinka palabra den bo boka

i bo lenga ta bira di kolebra.

6P'esei no ta mi boka,

ma esun di bo mes ta bo kondena;

bo propio lepnan ta testiguá kontra bo.

7Akaso bo ta pensa ku t'abo

ta e promé ser humano,

esun di mas ansiano i sabí,

nasé promé ku serunan a haña un lugá?

8Bo tin privilegio pa presensiá

seshonnan ku Dios ta tene?

Bo ta kere ku t'abo ta e úniko hende

ku sabiduria na mundu?

9Ki konosementu abo tin

ku nos sí no tin?

Ki komprondementu abo ta poseé

ku nos sí no por yega n'e?

10Hende bieu kabei blanku,

asta mas bieu ku bo propio tata,

ta na nos banda.

11Pakiko antó bo ta rechasá palabra,

papiá suavemente ku bo?

Bo no ta satisfecho

ku ta Dios mes ke konsolá bo?

12Pakiko bo ta pèrdè kòntròl

i bo wowonan ta chispa kandela,

13di manera ku bo ta ventilá bo rabia kontra Dios

i ta skupi sorto di palabra asina fo'i bo boka?

14Akaso hende por ta perfekto,

un mortal por ta korekto den tur kos?

15Si Dios no ta konfia ni esnan,

konstantemente den su presensia,

si shelu mes no ta kompletamente puru

den su bista,

16ki ta para antó pa hende,

baho i korupto,

ku ta hasi malu manera nada.

Elifaz ta bisa Job ku pa hende malbado no tin pas

17Skucha mi, mi ke splika bo algu;

laga mi konta bo loke mi a mira,

18loke sabínan mes a deklará,

sin tene nada skondí,

di loke nan a risibí

di nan antepasadonan,

19ku a haña e tera pa nan so;

sin ku mal influensia strañero

a alehá nan di SEÑOR.

20Un hende perverso ta sinti su mes agitá,

dia aden dia afó,

un burdugu asina ta biba henter su bida tormentá.

21Su oreanan ta tende hopi zonido spantoso;

ora e kere ku tur kos ta bayendo bon,

ata desgrasia pisá riba dje!

22E no tin niun tiki speransa

pa skapa di skuridat,

destiná e ta pa muri morto di spada.

23E ta kana dualu, buskando enbano

kon satisfasé su hamber,

Den su kurason e sa

ku t'e mes ta kousa di su propio ruina.

24Ansha i angustia ta domin'é,

pone su kurpa sakudí di teror;

nan ta basha bini riba dje

manera un rei, kla pa ataká

i disididu pa kanta viktoria,

25pasobra el a hisa man pa Dios

i a hunga wapu dilanti di Dios Todopoderoso.

26El a ranka sali kontra Dios,

ku kuèrdè di garganta ireis,

tras di un eskudo bon reforsá.

27Ounke su kara ta gordo, yen di vèt

i su barika ta bòltu di gordura,

28ounke el a logra rekonstruí

siudatnan ku SEÑOR a ruina

i a logra biba den kasnan,

destiná pa keda deshabitá,

29e no ta keda riku,

su rikesa no ta perdurá,

ni su propiedatnan no ta oumentá

den e pais.

30E no ta skapa di skuridat di morto;

lo e ta manera palu,

ku su spreitnan ta kima den kandela

i rosea di Dios ta supla manda leu.

31Mihó e n' gaña su mes

konfiando den loke ta vanidat,

pasobra e no ta haña nada pa rekompensa.

32E ta pashimá promé ku tempu,

su ramanan no ta bira bèrdè.

33Lo e ta manera mata di wendrùif,

ku ta pèrdè su drùifnan

promé ku nan hecha

i manera palu di oleifi

ku ta basha tur su flornan abou.

34Pasobra tur esnan

ku no ta konfia den Dios

lo para kaba na nada

i kandela lo kome kas di hende

ku ta gusta soborno.

35Nan ta konsebí problema i pari maldat;

nan seno ta produsí engaño.’