Isaías 2 - Papiamentu Bible with DC 2013(PBDC13)

Peregrinashon di nashonnan pa Herusalèm(Mikéas 4:1-3)

1Esaki ta palabra ku Isaías, yu di Amoz, a risibí den un vishon tokante Huda i Herusalèm.

2Den tempu final seru di tèmpel di SEÑOR

lo ta firme pará na kabes di tur seru,

esun mas altu di tur seritu.

Tur nashon lo basha bai ei,

3kantidat di pueblo lo marcha yega i bisa:

‘Ban subi seru di SEÑOR,

ban kas di Dios di Yakob:

t'E lo siña nos kon anda

i nos lo sigui e kaminda ku SEÑOR ta mustra.’

Pasobra instrukshon di SEÑOR lo sali fo'i Sion,

su palabra fo'i Herusalèm.

4Lo E husga entre pueblonan,

lo E ta árbitro den nashonnan.

E ora ei nan lo dirti nan spada pa traha chapi kuné

i nan lansa pa traha kuchú di kòrta maishi.

Nunka mas nashonnan lo no lanta spada kontra otro,

ni prepará nan mes pa guera.

5Bini, pueblo di Yakob,

ban kana den lus di SEÑOR.

Dia di SEÑOR, dia di huisio

6Bo a habri man laga bo pueblo bai,

e pueblo, desendiente di Yakob,

pasobra el a tuma yen di kustumber for di ost,

e ta praktiká montamentu manera e filisteonan

i ta hasi negoshi ku strañero,

7di moda ku nan pais ta pimpá ku oro i plata,

ku tesoronan sin fin;

ku tin kantidat di kabai

i garoshi di guera pa no kaba.

8Nan pais ta yen di dios falsu,

hende ta bùig i adorá

loke nan man mes a traha,

trabou di nan propio dedenan.

9T'asina hende ta rebahá nan mes,

dje hundu ei nan ta kai.

SEÑOR, no laga nan lanta!

10Hui drenta meimei di baranka,

skonde bou di tera

pa presensia teribel di SEÑOR,

pa splendor di su mahestat.

11Orguyosonan lo mester baha nan bista,

arogantenan lo ta humiliá.

E dia ei SEÑOR so lo ta alsá.

12SEÑOR soberano a pone un dia pa E lanta

kontra tur ku ta arogante i sobèrbè,

kontra tur ku ta alsa nan mes:

lo E humiliá nan.

13Lo E lanta kontra tur seder di Libanon,

altu i orguyoso,

i tur palu di ekel di Bashan,

14kontra tur seru arogante

i tur seritu tribí,

15kontra kada toren altu

i kada muraya fortifiká,

16kontra tur barku impreshonante

i tur boto luhoso.

17Orguyosonan lo ta humiliá,

arogantenan lo mester baha kabes.

E dia ei SEÑOR so lo ta alsá,

18tur dios falsu lo disparsé.

19Hende lo drenta skonde den kueba di baranka

i den buraku den tera

pa presensia teribel di SEÑOR,

pa splendor di su mahestat,

ora E lanta pa yena e pais ku sustu.

20E dia ei hende lo tira su diosnan falsu pa djaka i raton djanochi, e diosnan di oro i plata ku e mes a traha p'e adorá.

21Lo e skonde den spelònk i den kueba di baranka

pa presensia teribel di SEÑOR,

pa splendor di su mahestat,

ora E lanta pa yena e pais ku sustu.

22Stòp di konfia den hende,

su bida n' ta nada mas ku un rosea.

Hende no bal nada.