Predikador 10 - Papiamentu Bible with DC 2013(PBDC13)

1Meskos ku muska morto ta daña holó di perfume,

asina un tiki bobedat ta destruí basta sabiduria.

2Mente di hende sabí ta inkliná na kos bon,

pero esun di hende bobo ta inkliná na kos malu.

3Unda ku un bobo kana,

hende ta mira ku e no tin sintí;

e ta laga tur hende ripará kon bobo e ta.

4Ora un gobernante rabia ku bo,

no bandoná bo trabou,

pasobra trankilidat por plakia erornan grandi.

5Mi a mira un kos mashá malu aki riba mundu,

un eror ku outoridatnan ta keda hasi ketu bai:

6ta alsa bobedat dun'é hopi posishon altu,

miéntras hende kapas ta keda den posishonnan abou.

7Mi a mira katibunan ta kore riba kabai

i prínsipenan ku mester a bai na pia meskos ku katibu.

8Es ku koba un buraku por kai aden,

i kolebra por morde esun ku basha un muraya abou.

9Es ku kap piedra por heridá su mes;

es ku kap palu ta kore riesgo di haña herida na su kurpa.

10Si e hacha ta stòmpi i su rant no ta skèrpi,

mester di mas forsa,

pero sabiduria ta laga bo logra.

11Pakiko mester di un dominadó di kolebra

si e kolebra a morde kaba promé ku lag'é kai den trans?

12Loke un hende sabí bisa ta pon'é gana simpatia,

pero un hende bobo ta horka su kurpa ku loke e ta pretendé.

13E ta kuminsá ku papia kosnan sin pia sin kabes

i ta kaba ku blèblè kosnan peligroso.

14I e loko ta papia papia numa;

niun hende no sa kiko lo sosodé den futuro;

ta ken por kont'é kiko lo pasa despues ku e muri?

15E klètsmentu sin stòp di hende bobo ta asina un kansansio

ku nan mes no sa na unda nan a kuminsá.

16Ai di bo,

o pais di kua e rei ta un nobato

i di kual e prínsipenan ta kore paranda for di mainta.

17Felis e pais ku tin un rei di famia noble,

kaminda e noblesa ta bai mesa na ora fiho,

ta kome pa nan biba i no ta biba pa bebe burachi.

18Si bo ta floho i bo no ta saka un man,

e ora ei e balkinan lo bini abou

i e dak lo kuminsá lèk.

19Fiesta ta pa hari,

i biña ta hasi hende kontentu,

pero pa tur kos bo mester di plaka.

20No kritiká rei, ni sikiera den pensamentu.

No papia malu di hende riku, ni maske bo ta so,

pasobra paranan ta bula i nan por bai bis'é.