1Mi yu, paga atenshon na mi sabiduria
i habri orea pa mi komprenshon,
2pa bo por skohe bon kaminda
i por papia ku konosementu.
3Pasobra e muhé ku ta biba un bida parotin
tin mashá labio,
palabra yen di trastu.
4Pero ora bo tuma aden kuné,
e ta marga manera sentebibu,
skèrpi manera un nabaha.
5E ta hasi bo dianan kòrtiku,
yuda bo baha pa sawaka.
6E ke tene bo for di kaminda di bida,
p'esei e ta pone bo dualu bai kaminda robes,
sin ku bo ripará.
7P'esei, mi yunan, tende di mi,
no rechasá mi palabranan.
8Keda leu for di e muhé ku ta biba un bida parotin,
no aserká porta di su kas.
9Pa bo no pèrdè bo dignidat i tira bo bida afó,
pa motibu di un muhé sin kompashon.
10Pa strañero no gosa di bo rikesa,
i pa loke bo a logra ku tur bo forsa
no resultá den kas di deskonosí.
11E ora ei na final, ora bo pèrdè bo dignidat,
lo bo grita desesperadamente:
12‘Kon mi por a lubidá tur loke a siña mi?
Kon mi por a pone tur e atvertensianan ei un banda?
13Mira kon mi a keda sin tende di mi maestronan!
Mira kon mi a sera orea pa nan palabranan!
14E pueblo reuní por a mira
ku mi a hera di bai pèrdí.’
15Bebe awa for di bo mes baki di awa,
awa ku ta kore for di bo mes pos.
16Lo bo ke pa bo awa yena basha afó
i bo roinan yena kayanan?
17E pos i awa ta di bo so, di ningun otro hende mas.
No kompartí nan ku hende straño.
18Bendishoná sea bo pos!
Laga bo kasá satisfasé bo,
19un biná lif, un gasela enkantador;
laga su pechunan satisfasé bo semper,
keda enkantá konstantemente pa su karisia.
20Pakiko laga un muhé di bida enkantá bo antó?
Pakiko bras'é primié den bo kurpa?
21Nada no ta keda skondí pa SEÑOR.
Tur loke hende hasi E ta pone den balansa.
22Esun ku no tin Dios ta kai den trampa di su mes maldatnan,
keda pegá den laso di su mes piká.
23Lo e muri pasobra e no ta gusta korekshon,
su bobedat ta pon'é kai den pèrdishon.
Who We AreWhat We EelieveWhat We Do
2025 by iamachristian.org,Inc All rights reserved.
