1Job a rospondé:
2‘Mi ta fadá di tende e palabranan akí!
Ta konsoladó di awa dushi boso ta!
3Ki dia ta yega un fin
na e blablamentu ei sin pia sin kabes?
Ki mania di bo esei di keda pusta boka ku mi?
4Ami na boso lugá,
tambe lo por a papia meskos ku boso.
Mi tambe lo por a pega palabra bunita na otro
pa bisa boso,
sakudiendo mi kabes ku duele.
5Lo mi por a duna boso kurashi,
ku boka so sí,
hasiendo un esfuerso pa dominá
mi lepnan ku l'a tembla.
6Tantu bal papia o keda ketu,
tòg mi doló no ta haña alivio.
Job ta keha ku Dios ta trat'é ku violensia7Awor sí ta di bèrdè mes
Dios a kaba ku mi forsa.
Dios, Bo a laga tur mi hendenan
hororisá di spantu.
8Bo a humiliá mi
i esei ta demostrá ku Bo ta kontra mi;
mi mizeria ta prueba di mi kulpa.
9Dios ta gruña, saka djente
bora mi ku su mirada;
E ta sker mi den su rabia.
10Hende ta hasi bofon di mi.
Pa mustra nan menospresio
nan ta dal mi bòftá
i ta sera grupo pa ataká mi.
11Dios a entregá mi den man di un bandidu,
benta mi den gara di hende malbado.
12Tur kos tabata bai bon ku mi,
pero El a machiká mi;
El a kohe mi tene na mi pal'i garganta
i spat mi na pida pida.
E ta usa mi pa su blanko;
13su tiradónan di flecha a rondoná mi.
Su flechanan a traspasá mi higra
pero E no a sinti niun tiki kompashon;
mi higra a basha su hal riba suela.
14E ta bula riba mi manera guerero,
heridá mi kada be di nobo.
15Paña di rou a bira mi di dos kueru
i mi a hinka mi kabes den stòf.
16Mi wowonan ta hinchá di yora,
nan ta pretu bou di nan,
17pasobra mi mannan nunka no tabata violento
i mi orashon na Dios tabata sinsero.
18O tera, no tapa mi sanger;
mare mi gritu por keda sklama pa hustisia.
19Na e momento akí mes mi tin un testigu den shelu,
sí, ayariba mi abogado ta boga pa mi.
20Mi amigunan ta trata mi ku despresio,
miéntras mi ta yora na Dios.
21Pero mi abogado sí ta boga pa mi serka Dios,
manera pa un amigu.
22Mi dianan ta kontá,
mi tin ku kohe e kaminda sin regreso.
Who We AreWhat We EelieveWhat We Do
2025 by iamachristian.org,Inc All rights reserved.
