Sirag 35 - Papiamentu Bible with DC 2013(PBDC13)

1Esun ku kumpli ku lei

ta ofresé hopi sakrifisio.

Esun ku kumpli ku mandamentunan,

ku esei ta ofresé un sakrifisio di pas.

2Esun ku hasi un obra di karidat,

ku esei ta hasi un ofrenda vegetal na Dios.

Esun ku duna un limosna,

ta ofresé un sakrifisio di akshon di grasia.

3Ta agradá Señor si hende bira lomba pa maldat,

kibra ku inhustisia ta ofresé un sakrifisio pa pordon di piká.

4Sinembargo no presentá man bashí den tèmpel di Señor,

pasobra El a preskribí tur e sakrifisionan akí.

5Ofrenda di un hende birtuoso ta enrikesé altá.

Holó agradabel di su ofrenda

ta subi te dilanti di trono di Dios Altísimo.

6Sakrifisio di e hende ei ta agradabel den bista di Dios

i ta keda pa semper grabá den su memoria.

7Honra Señor generosamente,

i no sea pichiri ora bo ta duna un ofrenda.

8Kada be ku bo ofresé un sakrifisio, hasié kara kontentu.

Presentá ku alegria désimo parti di loke bo ta gana.

9Ofresé na Dios Altísimo segun E ta duna bo.

Duna kontentu loke ta na bo alkanse.

10Pasobra Señor lo debolbé bo ku man yen.

L'E paga bo shete be mas tantu.

11No trata na soborná Señor, E no ta hasi kaso,

ni pone konfiansa den un sakrifisio inhustu,

12pasobra Señor ta hues,

serka djE no tin distinshon di persona.

13E no ta faboresé niun hende riba kustia di un pober.

E ta skucha orashon di un hende privá di su derecho.

14E no ta keda sin skucha orashon

di un yu ku no tin mama,

ni di un biuda ku ta deshogá su kurason.

15Lágrima n' ta kore na su kara?

E biuda no ta keha riba esun ku ta pone su lágrimanan kore?

16Pa bo haña akohida serka Dios

bo tin ku sirbiÉ segun su boluntat;

e ora ei bo orashon ta yega te na shelu.

17Orashon di un pober ta pasa den nubia bai;

tanten ku e no yega su meta e ta inkonsolabel;

18e no ta sosegá promé ku Dios for di altura a tira su bista riba dje,

a duna hende hustu su derecho i a parti hustisia.

19Señor no ta laga hende warda,

i lo E no tene kompashon ku esnan ku no ta tene kompashon ku otro,

20pero lo E kibra nan hep.

Lo e duna paganonan nan kastigu,

21kaba ku tur hende arogante

i kibra poder di hende inhustu.

22Lo E duna kada hende loke e meresé

pa su obra- i intenshonnan.

23Lo E hasi hustisia na su pueblo

i hasi nan kontentu ku su piedat.

24Su kompashon den tempu di opreshon ta mes bonbiní

ku nubia yen awa den tempu di sekura.