1Den e serunan di Efraim tabata biba un hòmber yamá Mikas.
2El a bisa su mama: ‘Dia nan a hòrta 1100 plaka di plata for di bo, mi mes a tende bo maldishoná e ladron. T'ami tin e plata ei; ta ami a hòrt'é!’ Su mama a kontestá: ‘SEÑOR bendishoná bo, mi yu.’
3Despues e yu a duna su mama e 1100 plakanan di plata bèk. Ma su mama a bis'é: ‘Pa kita e maldishon ku tin riba bo, mi ta konsagrá e plata na SEÑOR. Ata e plata akí, laga traha un imágen kuné i fur'é ku plata.’
4Pero Mikas a debolbé su mama e plata. E ora ei e mama a kohe 200 pida hiba pa un platé ku a traha un imágen i fur'é ku plata. Nan a pone e imágen na kas di Mikas,
5kaminda e tabatin un santuario. El a yega di traha algun dios di kas i un efod. Tambe el a konsagrá un di su yunan i hasié saserdote.
6Den e tempu ei no tabatin rei na Israel, e hendenan tabata hasi i deshasí.
7Na Betlehèm di Huda tabata biba un yònkuman levita ku tabata pertenesé na tribu di Huda. E tabata biba komo strañero einan.
8El a sali for di e siudat pa wak si e por a haña un otro kaminda di biba. Na kaminda den e serunan di Efraim el a yega na kas di Mikas.
9Mikas a puntr'é: ‘Di unda bo ta?’ El a kontestá: ‘Mi ta un levita di Betlehèm di Huda. Mi ta buska un otro kaminda di biba.’
10E ora ei Mikas a bis'é: ‘Bin biba aki. Bo por bira pa mi manera un tata i mi saserdote. Fuera di paña i kuminda, mi por duna bo dies plaka di plata pa aña.’
11E levita a disidí di keda serka Mikas. Mikas tabata trata e yònkuman komo si fuera tabata su mes yu.
12El a konsagrá e levita i hasié saserdote; e levita a keda biba serka dje.
13E ora ei Mikas a pensa: ‘Awor mi ta sigur ku SEÑOR lo manda hopi bendishon pa mi, pasobra mi tin un levita komo saserdote.’
Who We AreWhat We EelieveWhat We Do
2025 by iamachristian.org,Inc All rights reserved.
