1Asina rei Ezekías a tende e palabranan akí, el a sker su paña, bisti un paña di saku komo señal di duele i bai tèmpel di SEÑOR.
2El a manda Elyakim, e mayordomo di palasio, Shebna, e sekretario, i e kabesantenan di e saserdotenan serka profeta Isaías,Isaías 1:1 yu di Amoz. Tur tabatin paña di saku bistí.
3Nan a duna Isaías e siguiente rospondi di rei: ‘Awe nos ta haña nos den pèrtá, nos ta haña nos kastigá i humiliá! Manera nan ta bisa: E muhé su ora a yega, pero e no tin forsa pa trese e yu na mundu.
4Rei di Asiria a manda su komandante pa ofendé Dios bibu. Podisé SEÑOR, bo Dios, por tuma e ofensanan akí na kuenta i kastigá nan. P'esei resa pa esnan di nos ku t'ei ainda.’
5Ora e funshonarionan di rei Ezekías a yega serka Isaías,
6el a duna nan e siguiente kontesta pa nan rei: ‘SEÑOR ta bisa: “No tene miedu di e palabranan ofensivo ku e funshonarionan di rei di Asiria a dirigí na Mi.
7Lo Mi influensi'é di tal manera ku e ta kere rumornan ku ta kore i bolbe su pais. Aya lo Mi laga mat'é.” ’
8Ora e komandante a tende ku su rei a bai for di Lakish pa ataká e siudat Libna, el a bai aya serka dje.
9Na Libna rei a haña notisia ku rei Tirhaka di Etiopia a sali pa bringa kontra dje. Pa e motibu ei rei di Asiria a bolbe manda su mensaheronan serka Ezekías ku e enkargo
10pa partisipá Ezekías, rei di Huda, lo siguiente: ‘No laga bo Dios, den kende bo ta konfia, gaña bo ku Herusalèm lo no kai den poder di rei di Asiria.
11Bo mes lo mester a tende ku e reinan di Asiria semper a destruí tur e paisnan ku nan a invadí. I abo lo por skapa?
12Esnan ku a goberná promé ku mi a destruí Gozan, Haran, Resef i e hendenan di Bet-Eden, ku tabata biba na Telasar; nan diosnan por a salba nan antó?
13Unda e reinan di e siudatnan Hamat, Arpad, Sefaruaim, Hena i Iwa a keda?’
14Ezekías a tuma e karta serka e mensaheronan. Ora el a kaba di les'é, el a bai tèmpel i a pone e karta habrí dilanti di SEÑOR.
15Ezekías a resa aya: ‘SEÑOR, Dios di Israel, Abo ku tin bo trono riba kerubinnan,Éksodo 25:18-22; 1 Samuel 4:4; Salmo 80:1; Isaías 37:16; Ezekiel 1:26-28 t'Abo so ta Dios di tur nashon di mundu. Abo a traha shelu i tera.
16Skucha ku atenshon, SEÑOR, habri bo wowo. Skucha e mensahe ku Sanherib a manda pa ofendé Abo, Dios bibu.
17En bèrdat, SEÑOR, reinan di Asiria a destruí e pueblonan ei i nan paisnan.
18Nan a tira nan diosnan den kandela. E reinan por a destruí e diosnan ei pasobra nan no tabata dios, nan tabata kos ku man di hende a traha di palu i di piedra.
19Libra nos awor, SEÑOR nos Dios, for di gara di Sanherib; e ora ei tur reino di mundu ta haña sa, SEÑOR, ku t'Abo so ta Dios.’
20E ora ei Isaías, yu di Amoz, a manda bisa Ezekías: ‘Asina SEÑOR, Dios di Israel, ta bisa: “Mi a skucha e orashon, ku bo a hasi na Mi tokante Sanherib, rei di Asiria.
21Ata e palabranan ku SEÑOR ta bisa tokante rei di Asiria:
E siudat Sion, manera un mucha muhé,
ta hari bo i hasi chèrchè di bo.
Herusalèm komo señal di bofon
ta sakudí kabes tras di bo lomba.
22Bo sa ken bo a ofendé i insultá?
Bo sa kontra ken bo a alsa bos
i ken bo a wak ku despresio?
Ta e Dios Santu di Israel!
23Pa medio di bo mensaheronan bo a ofendé SEÑOR.
Bo a bisa:
Ku mi numeroso garoshinan
mi ta subi kabesnan di seru,
e tòpnan di mas altu di Libanon.
Mi ta kap su palunan di seder di mas altu
i su palunan di siprès di mas bunita
i penetrá te den su partinan di mas skondí,
te den su mondinan di mas será.
24Den paisnan straño
mi ta koba pos i bebe nan awa.
Asina mi pia toka riunan di Egipto, nan ta seka.
25Bo no sa anto ku t'Ami
for di hopi tempu pasá a disponé asina
i ku for di den tempu bieu Mi a plani'é
i awor ta lag'é sosodé?
P'esei bo mester a destruí siudatnan reforsá, hasi di nan un ruina.
26Nan habitantenan no por a hasi nada,
nan tabata yen di miedu i yen di bèrgwensa,
nan a keda manera yerba den kunuku,
manera yerba bèrdè,
manera yerba ku ta krese riba dak
òf manera maishi ku a seka, promé ku el a hecha.
27Pero Mi konosé bo, Sanherib,
Mi sa tur bo hasínan,
i sa kon bo a sapatiá kontra Mi.
28I komo bo a sapatiá kontra Mi i Mi a tende di bo arogansia,
Mi ta pasa mi hak den bo nanishi,
i pone mi frena den bo boka,
pone bo bira bèk pa e mes kaminda ku bo a bini.
29I pa bo, Ezekías, ta konta e siguiente señal:
E aña akí boso lo kome loke kunuku produsí
i otro aña loke nase di mes.
Pero sembra e di tres aña i kome loke boso kosechá,
planta kunuku di wendrùif i kome nan fruta.
30E hendenan di Huda ku sobrebibí
lo bira manera mata ku ta tira nan rais hundu den tera i duna fruta.
31Esnan ku sobrebibí lo sali for di Herusalèm,
e seru di Sion, plama den e pais.
Ami, SEÑOR soberano, lo realisá esei. Mi amor ta garantia.
32SEÑOR ta bisa tokante rei di Asiria:
E no ta drenta e siudat akí
ni tira flecha riba dje
ni atak'é, i protegé su mes ku eskudo,
ni lanta un muraya pareu rondó di dje.
33Di e mesun kaminda ku el a bini, e ta bai bèk;
e siudat akí sí, e no ta drenta.
Esaki ta palabra di SEÑOR.
34Ami ta protegé e siudat akí
i salb'é pa mi mes honor
i pa kara di mi sirbidó David.” ’
35E mesun anochi ei Angel di SEÑOR a drenta den e kampamentu di Asiria i mata 185.000 hòmber. Su manisé ta blo kadaver hende tabata weta.Sirag 48:21
36E ora ei Sanherib, rei di Asiria, a desarmá su kampamentu for di ei i a bolbe Nínive. Aya el a keda.
37Un dia ku Sanherib tabata na rudia den tèmpel ta adorá su dios Nisrok, su yu hòmbernan Adramelèk i Saresèr a hink'é mata. Nan a logra hui bai e pais Ararat. Su yu Esar-Hadon a bira rei na su lugá.
Who We AreWhat We EelieveWhat We Do
2025 by iamachristian.org,Inc All rights reserved.
