Sirag 21 - Papiamentu Bible with DC 2013(PBDC13)

DISIPLINA, OTRO BON KARAKTERÍSTIKAGuera avisá no ta kohe tera

1Mi yu, bo a hasi malu? No hasié mas

i pidi pordon pa bo fayonan di ántes.

2Hui pa piká manera bo ta hui pa kolebra,

pasobra si bo yega serka, e ta morde bo.

Su djentenan ta djente di leon.

E ora ei ayó bida.

3Tur maldat ta manera spada di dos banda,

pa su herida no tin kura.

4Bromamentu deskará di rikesa ta hasi hende pober,

asina hende orguyoso ta ruiná su mes;

5pero orashon di un pober ta yega na orea di Dios

i mesora E ta hasi hustisia p'e.

6Es ku nenga korekshon ta keda riba mal kaminda,

pero es ku ta respetá Señor ta tuma korekshon na pechu.

7Un oradó por tin fama mundial,

ma un sabio sa unda e ta robes.

8Es ku traha su kas ku plaka di otro hende

ta manera hende ku ta montoná piedra pa su mes graf.

9Un tou di bandidu ta manera un bòshi west,

nan fin ta un vlandam di kandela.

10Kaminda di pekadó ta lizu, sin piedra,

ma ta kaba den un abismo.Hende serio i hende desformal

11Es ku ta opservá Lei ta dominá su pensamentunan,

rèspèt pa Señor den tur kos ta hasi hende sabí.

12Tin ku bo no por siña nada nada,

otro ta asina sabí, ku nan ta molestiá hende.

13Saber di un sabio ta krese manera un riu,

su konseho ta manera un fuente di awa bibu.

14Kabes di un kèns, ta manera un barí sin bòm:

loke drenta djaki ta sali djaya.

15Ora un hende inteligente tende un proverbio,

e ta gab'é i agregá un mas;

pero un hende desformal ku tend'é,

ta keda sin gust'é i ta lubid'é mesora.

16Skucha un kèns ta manera kana ku un maleta pisá;

enkambio esta dushi pa tende un hende inteligente papia!

17Loke un sabio tin di bisa, komunidat gusta skucha;

tur hende ta pensa seriamente riba su palabranan.

18Pa un kèns sabiduria no ta nada mas ku un kròt

i siensia n' ta nada mas ku papiamentu sin pia sin kabes.

19Pa un kèns siña ta mes fastioso

ku un bui na su man òf un kadena na su pia.

20Un kèns ta hari duru,

un sabio ta sonreí diskretamente.

21Pa un sabio siña ta mes bunita

ku un prenda di oro òf un pulsera na brasa.

Bon manera di trata hende

22Un kèns ta kore drenta un kas,

pero un hende kortes ta keda warda modestamente.

23Un hende ònbeskòp ta para na porta lur paden,

pero un hende bon eduká ta keda para pafó.

24Para skucha na porta ta muestra di mal manera;

un hende ku edukashon lo a muri di bèrgwensa.

25Un hende lenga largu ta keda ripití loke otro a bisa;

un hende ku ta usa su sintí ta pisa kada palabra.

26Un kèns ta papia sin pensa,

un sabio ta pensa promé ku e papia.

27Ora un hende brutu kuminsá zundra un atversario,

ta e mes e ta zundra en realidat;

28un hasidó di redu en realidat ta susha su mes

i pone tur hende den bisindario odi'é.