Proverbionan 2 - Papiamentu Bible with DC 2013(PBDC13)

1Yu, si bo tuma mi palabranan hasi di bo

i warda mi mandamentunan den bo mente,

2si bo habri bo orea pa sabiduria

i bo mente pa konosementu,

3si enberdat bo yora pa komprenshon

i grita pa haña konosementu,

4si bo busk'é, manera ta tras di plaka bo ta

òf manera ta kore bo ta kore tras di un tesoro skondí,

5e ora ei lo bo komprondé kiko ta nifiká

‘tin rèspèt di SEÑOR’,

i e ora ei lo bo deskubrí kiko ta nifiká

‘siña konosé Dios’.

6Pasobra SEÑOR ta duna sabiduria,

ta for di su boka komprenshon i konosementu ta sali.

7E ta garantisá éksito duradero pa hende hustu

i ta un eskudo pa hende rekto.

8E ta kuida esnan ku ta kana ku hustisia

i ta protegé esnan ku ta fiel n'E.

9E ora ei lo bo sa kiko ta nifiká:

ta un hende rekto, biba un bida bon den bista di Dios i di hende,

trata tur hende sin hasi distinshon.

E ora ei lo bo sa kon bo tin ku biba.

10Pasobra sabiduria lo bini den bo kurason

i konosementu lo ta un plaser pa bo alma.

11E ora ei koutela i konosementu

lo protegé bo i warda bo.

12Sabiduria lo protegé bo kontra mal hende,

kontra hende ku ta trose bèrdat,

13kontra esnan ku ta kita for di bon kaminda

pa sigui esun malu,

14kontra esnan ku ta gosa di kos ku ta malu

i alegrá nan den perversidat di maldat,

15kontra esnan ku ta kana riba kaminda korkobá

i ta malisioso den nan andá.

16Sabiduria lo warda bo tambe

di e muhé ku no ta di bo,

maske kuantu e trastia bo;

17di e muhé ku a bandoná su esposo

i ta lubidá su kompromiso ku Dios.

18Su kas ta bira bo pèrdishon,

ta nifiká bo morto.

19Es ku bai serka un muhé asina

no ta bolbe hamas riba e kaminda di bida.

20Asina ta: kana den kaminda di hende bon

i keda riba kaminda di hende hustu.

21Esnan ku ta honesto por keda den e pais,

esnan ku ta hustu ta haña un lugá pa keda biba.

22Pero ta kore ku esnan ku no tin Dios

i ta bari saka esnan ku no ta fiel na Dios.