1 Krónikanan 15 - Papiamentu Bible with DC 2013(PBDC13)

Traslado di e arka pa Herusalèm(2 Samuel 6:12-19)

1Despues David a traha palasionan pa e mes usa den Siudat di David. El a skohe un lugá fiho i a lanta un tènt ei pa e pone e arka di aliansa di Dios.

2Ora el a kaba, el a duna e siguiente òrdu: ‘E levitanan so mag karga e arka di aliansa, pasobra ta nan Dios a skohe pa hasi esei i pa sirbiÉ semper.’

3Despues David a reuní tur e israelitanan na Herusalèm pa hiba e arka na e lugá ku el a destiná p'e.

4For di e saserdotenan, desendientenan di Aaron, i e levitanan el a traha e siguiente gruponan:

5di famia Kehat: 120 hòmber, bou di guia di Uriel;

6di famia Merari: 220 hòmber bou di guia di Asaías;

7di famia Guershon: 130 hòmber bou di guia di Yoel;

8di famia Elisafan: 200 hòmber bou di guia di Shemaías;

9di famia Gebron: 80 hòmber bou di guia di Eliel;

10di famia Uziel: 112 hòmber bou di guia di Aminadab.

11Despues David a yama e saserdotenan Sadok i Abyatar i e levitanan Uriel, Asaías, Yoel, Shemaías, Eliel i Aminadab serka dje.

12El a bisa nan: ‘Boso ta kabes di e famianan levita. Purifiká boso huntu ku e otro miembronan di boso tribu, pa boso por trasladá e arka di SEÑOR, Dios di Israel, pa e lugá ku mi a destiná p'e.

13Pasobra boso no a karga e arka bia pasá, nos a risibí un sla duru di SEÑOR, nos Dios. Nos no a konsultá kunÉ manera debe ser.’

14P'esei e saserdotenan i e levitanan a purifiká nan mes pa trasladá e arka di SEÑOR, Dios di Israel.

15E levitanan a karga e arka di Dios ku su baranan riba nan skouder, manera Moises a manda nan segun òrdu di SEÑOR.

16Tambe David a ordená e kabesnan di e levitanan pa pone algun di nan rumannan komo kantor pa kanta kantika kontentu, kompañá pa instrumènt manera siter, arpa i platío.

17E levitanan a skohe Heman, yu di Yoel, i tambe Asaf, yu di Bèrèkías ku tabata famia di Heman; di e desendientenan di Merari, ku tabata famia di esnan menshoná kaba, nan a skohe Etan, yu di Kushayahu.

18Tambe nan a nombra levitanan ku tabata sigui nan den rango: Zekarías, Yaaziel, Shemiramot, Yehiel, Uni, Eliab, Benayahu, Maasea, Matitías, Eliflehu, Mikneyahu i e guardianan na entradanan di tèmpel Obed-Edom i Yeiel.

19E kantornan Heman, Asaf i Etan mester a toka platío di koper;

20Zekarías, Aziel, Shemiramot, Yehiel, Uni, Eliab, Maasea i Benayahu mester a toka riba arpa altu istèm;

21Matitías, Eliflehu, Mikneyahu, Obed-Edom, Yeiel i Azaziahu a toka siter un oktaf mas abou pa kompañá e otro instrumèntnan.

22Kenanías, hefe di e levitanan, tabatin transporte na su enkargo; e tabata un bon organisadó, p'esei el a regla transporte di e arka.

23Bèrèkías i Elkana a kana komo guardia dilanti di e arka.

24E saserdotenan Shebanías, Yoshafat, Netanel, Amasai, Zekarías, Benayahu i Eliezer a toka tròmpèt dilanti di arka di Dios. Obed-Edom i Yehías a kana komo guardia tras di e arka.

25Asina David, e ansianonan di Israel i e hefenan di mil sòldá a bai kas di Obed-Edom i kontentu nan a trasladá e arka di aliansa di SEÑOR for ei.

26Awor ku e levitanan tabata karga e arka di aliansa di SEÑOR, Dios tabata yuda nan i nan a ofresé shete toro i shete chubat'i karné komo sakrifisio.

27David tabatin un paña largu di lenen fini bistí meskos ku tur e levitanan ku tabata karga e arka, e kantornan i Kenanías ku tabata dirigí e transporte. Tambe David tabatin un frèskòt saserdotal bistí.

28Asina henter Israel a trasladá e arka di aliansa di SEÑOR bou di gritu i zonido di kachu, tròmpèt, platío, arpa i siter.

29Ora e arka di aliansa di SEÑOR tabata serka di drenta Siudat di David, Mikal, yu muhé di Saul i esposa di David, tabata pará den bentana ta wak afó. El a mira David ta bula rònt ta balia i a sinti un despresio profundo p'e.