1SEÑOR ta bisa:
‘Supla kachu, bati alarma!
Manera un águila e enemigu ta zueif riba mi pueblo,
pasobra nan a kibra mi aliansa
i a rebeldiá kontra mi leinan.
2Nan ta grita bisa Mi: “Mi Dios!
Nos, Israel, ta rekonosé Bo!”
3Pero un Israel,
ku ta pusha loke ta bon fo'i su kurpa,
un enemigu lo persiguié.
4Nan a nombra reinan,
pero sin konsultá Mi;
nan a skohe lidernan pa nan mes,
pero sin ku Mi tabata sa.
Di nan plata i oro nan a traha imágen di diosnan falsu,
bon pa keda destruí.
5Samaria, bo toro yòn di oro ta repugnante!
Mi a bira furioso riba e habitantenan di Samaria.
Ta kuantu tempu mas falta promé nan lo por bira puru?
6E imágen di toro ei,
n' ta for di Israel e ta bini?
Un artesano a trah'é,
pero e n' ta un dios!
Di e imágen di toro ei for di Samaria,
lo traha puiru!
7Nan ta sembra bientu,
i nan lo kosechá tempestat.
Tapushi ku no ta saka pipita,
no por produsí hariña;
si nan produsí algu mes,
strañeronan lo gulié.
8Ta guli Israel.
E pueblonan ta wak Israel ku despresio,
manera ta wak potoshi ku ningun hende no ke mas,
9pasobra nan a sali bai Asiria.
Un buriku di mondi ta keda serka su pareunan,
pero Efraim ta kumpra amante ku regalo.
10I ounke nan ta haña amante entre e pueblonan,
Ami lo hasi kuenta ku nan awor akí.
Pronto nan lo krem den otro,
kana doblá bou di e karga di e rei mas poderoso.
11Sí, Efraim a hasi su altánan numeroso,
pero nan a sirbi pa hasi piká,
altánan pa hasi piká!
12Maske kuantu bia Mi preskribí nan mi leinan,
nan ta konsiderá nan leinan di un strañero.
13Nan ta ofresé sakrifisio,
kome e karni,
pero Ami, SEÑOR, nan no ta agradá.
Mi no ta lubidá nan maldat,
Mi ta kastigá nan pikánan:
nan ta bai Egipto bèk!
14Israel a lubidá ken a trah'é,
el a konstruí palasio,
i Huda tambe a konstruí hopi siudat reforsá.
Kandela lo mi manda riba nan siudatnan,
vlamnan lo destruí su fòrtinan.’
Who We AreWhat We EelieveWhat We Do
2025 by iamachristian.org,Inc All rights reserved.
