Predikador 8 - Papiamentu Bible with DC 2013(PBDC13)

1Niun hende no ta realmente sabí,

pasobra niun n' ta kapas di penetrá

te den sentido di kosnan.

Pero si un hende ta sabí

sabiduria ta reflehá for di su kara,

kambia e ekspreshon duru.

2Di mas mihó ta: hasi loke rei ta ordená, pasobra bo mester a primintí esei bou di huramentu.

3Ora bo ta serka rei, no sali bai lag'é promé ku ora, ni keda persistí tampoko den un kaso ku por kousa daño, pasobra tòg ta loke e ke e ta hasi.

4Loke rei bisa ta lei. Ken lo por riska pidié kuenta i rason?

5Esun ku aten'é na regla,

no ta hañ'é den problema.

Hende sabí ta komprondé

ki ora i kon mester aktua.

6Pasobra tur kos tin su tempu eksakto

i su prosedura korekto.

Ounke tin un problema komun ta limitá kada hende.

7Hende no sa loke futuro ta enserá.

Ken lo por kont'é e kos ei?

8Niun hende no tin kòntròl

riba bida pa por keda hala rosea,

niun hende no por posponé su morto,

tempu di guera niun hende no ta haña verlòf,

for di maldat no por saka probecho.

9Tur e kosnan akí mi a mira i mi a paga tinu na kada kos ku a sosodé riba e mundu akí, miéntras esun hende ta manda riba e otro pa perhudik'é.

10Ademas mi a mira ku hende ku hasi maldat ta haña entiero, pero hende ku biba bon tin ku bai for di e lugá sagrado i ta lubidá riba nan den siudat. Esei tambe ta apsurdo.

11Komo no ta kastigá maldat mesora, hende ketu bai ta buska pa hasi maldat.

12Ounke un mal hende kometé shen krímen i tòg keda biba largu, mi sa ku lo bai hende ku tin rèspèt di Dios i ta teme Dios, mihó;

13i ku lo no bai mal hende bon, nan lo no biba largu, nan bida lo no larga manera un sombra, pasobra nan no tin rèspèt di Dios.

14E situashon apsurdo akí tambe ta tuma lugá: tin kos ta pasa hende hustu komo si fuera ta bandidu nan ta i tin kos ta pasa bandidu komo si fuera ta hende hustu nan ta.Salmo 73; Yeremías 12:1-4; Habakuk 1:2-4,12-17 Esaki tambe ta apsurdo.

15P'esei mi ta gaba esnan ku ta gosa di nan bida, pasobra e kos di mas mihó pa hende riba e mundu akí ta ketu bai: kome i bebe i ta kontentu. Ta e úniko kos ku e tin tanten ku e ta mata kurpa den e eksistensia kòrtiku ku Dios ta dun'é aki riba mundu.

16Ora mi a pone mi pa konosé sabiduria i pa mira e tarea pisá akí riba mundu, e tarea akí di mata kurpa di dia i anochi sin sosegá nunka,

17e ora ei mi a deskubrí tur kos ku Dios a hasi. Niun hende no por komprondé loke Dios ta hasi aki riba mundu, ni maske kuantu esfuerso hende hasi e no ta haña sa. Asta ora un hende sabí pretendé ku e sa, den realidat e no por a haña sa.