Salmo 149 - Papiamentu Bible with DC 2013(PBDC13)

SALMO 149Himno di viktoria

1Alabá sea SEÑOR!

Kanta pa SEÑOR un kanto nobo;

alab'É den asamblea di su fielnan!

2Laga Israel legra den su outor,

yunan di Sion kanta gloria di nan Rei!

3Nan alabá su nòmber ku balia,

nan kanta salmo p'E ku arpa i tamburein.

4Komo SEÑOR ta enkantá ku su pueblo,

i E tin korona di viktoria pa humildenan.

5Laga su fielnan gosa di e triunfo,

grita kontentu fo'i den nan kampamentu

6ku alabansa di Dios na nan boka

i spada di dos banda den man,

7pa tuma vengansa riba pueblonan

i duna kastigu na nashonnan;

8pa mara reinan ku kadena

i nan lidernan ku bui di heru;

9pa ehekutá na pia di lèter

e sentensia diktá kontra nan.

Esta un orguyo pa su fielnan!

Alabá sea SEÑOR!