1Asina Tobias a biaha te ora nan tabata serka di yega Nínive. E ora ei Rafael a bisa Tobias:
2‘Ruman, bo ta kòrda tòg den ki situashon nos a laga bo tata?
3Laga nos bai promé ku bo kasá, ya nos ta drecha e kas tanten e otronan ta yega.’
4Nan dos a kontinuá nan biahe huntu ku e kachó nan tras. E ora ei Rafael a bisa Tobias: ‘Sòru pa bo tin e hal na man.’
5Mientrastantu Ana, kantu di kaminda, tabata wak si su yu tabata bini; el a mir'é ta bini i a bisa Tobit:
6‘Ata bo yu ta bini ku e hòmber ku a biaha kuné.’
7Promé nan yega kas di Tobias su tata, Rafael a bis'é: ‘Bo tata ta haña su bista bèk, mi ta sigur di esei.
8Hunta su wowonan ku hal di e piská! E remedi lo pone nan kuminsá kishikí i e ora ei e mancha blankunan lo kita for di su wowonan. Bo tata lo haña su bista bèk i lo e mira lus atrobe.’
9Mientrastantu Ana a kore yega serka, el a brasa su yu i grita: ‘Porfin mi ta mira bo atrobe, mi yu! Awor mi por muri.’ El a basha gritu di yoramentu.
10E ora ei Tobit a kana bini. El a hera di trompeká ora e tabata bai sali for di porta.
11Tobias ku tabatin e hal di piská den su man a yega serka su tata i kohe su man tene. Despues el a supla den Tobit su wowonan i bis'é: ‘Tene kurashi, tata!’ Mesora el a hunta e remedi na Tobit su wowo.
12Kaba ku tur dos man el a frega e flishi blanku saka for di e hukinan di wowo.
13E ora ei Tobit a brasa su yu i ku awa na wowo el a bis'é: ‘Porfin mi ta mira bo atrobe, mi yu, lus di mi wowo.’
14I el a bisa: ‘Bendishoná Bo ta, Dios, i bendishoná ta su nòmber grandi i bendishoná ta tur angel te den eternidat. El a kastigá mi, i ata mi ta mira mi yu Tobias.’
15Tobias a drenta kas mashá kontentu i alabando Dios na bos altu. Despues el a konta su tata kon bon e biahe a bai, ku el a trese e plaka i ku el a kasa ku Sara, yu di Raguel, i ku ya Sara mester ta serka di yega porta di Nínive.
16Despues Tobit a bai kontra su suegra na porta di Nínive, yen di alegria i alabando Dios. Tur hende di Nínive a mir'é ta kana ku pasonan firme i sin guia. Tobit a duna testimonio abiertamente ku ta Dios tabatin mizerikòrdia kuné i a dun'é su bista bèk.
17Ora Tobit a yega serka su suegra Sara, el a kumind'é i bis'é: ‘Bonbiní, mi yu. Bendishoná sea bo Dios ku a trese bo serka nos i bendishoná sea bo tata, mi yu Tobias i abo tambe, mi yu. Bonbiní na bo kas! SEÑOR bendishoná bo i duna bo alegria. Drenta, mi yu!’
18Tur hudiu na Nínive a kompartí e alegria e ora ei.
19Tobit su subrinanan Ahiakaro i Nasbas tambe a bini kontentu serka dje.
Who We AreWhat We EelieveWhat We Do
2025 by iamachristian.org,Inc All rights reserved.
