1Duna grasia na SEÑOR, komo E ta bon,
— su amor ta eterno!
2Laga Israel bisa awor:
— su amor ta eterno!
3Laga tur saserdote bisa awor:
— su amor ta eterno!
4Tur sirbidó di SEÑOR, bisa awor:
— su amor ta eterno!
5Den mi ansha mi a sklama na SEÑOR,
SEÑOR a tende i a duna mi rosea.
6SEÑOR ta ku mi, p'esei mi n' tin miedu,
anto kiko hende por hasi mi?
7SEÑOR ta ku mi, E ta yuda mi;
ta p'esei mi por mira derota
di tur esnan ku ta odia mi.
8Buska refugio serka SEÑOR
ta mihó ku busk'é serka hende.
9Buska refugio serka SEÑOR
ta mihó ku dependé di hende altu.
10Tur nashon a changa mi,
ma den nòmber di SEÑOR m'a machiká nan.
11Nan a changa mi, sera mi aden,
ma den nòmber di SEÑOR m'a machiká nan.
12Manera abeha nan a rondoná mi,
un kandel'i taki seku — el a paga!
ma den nòmber di SEÑOR m'a machiká nan.
13Nan a stot mi, pusha mi pa mi kai,
pero SEÑOR a kore bin yuda mi.
14Mi ta kanta pa SEÑOR, E ta mi forsa,
El a trese mi salbashon.
15Tende e gritu di alegria i triunfo!
Ta den tèntnan di pueblo di Dios:
man di SEÑOR a mustra su poder!
16Man di SEÑOR ta alsá!
Man di SEÑOR a mustra su poder!
17Lo mi no muri, nò, lo mi biba
i lo mi konta di SEÑOR su hazañanan.
18SEÑOR a bati mi mal batí,
pero no a pèrmití pa mi muri.
19Habri portanan santu pa mi,
mi ke drenta i alabá SEÑOR.
20Ata e porta di SEÑOR akí,
tur e fielnan ta pasa den dje.
21Mi t'alabá bo pasobra B'a skucha mi,
pasobra B'a manda mi salbashon.
22E piedra, rechasá p'e trahadónan,
esei a bira piedra prinsipal;
23ta trabou di SEÑOR esei,
ta algu milagroso pa mira!
24Awe t'e dia ku SEÑOR a traha,
ban kanta di alegria i hasi fiesta!
25O SEÑOR, duna nos salbashon,
o SEÑOR, duna prosperidat.
26Bendishoná ta esun ku ta bini
den nòmber di SEÑOR.
Nos, for di tèmpel di SEÑOR
ta risibí boso ku bendishon.
27SEÑOR ta Dios, E ta manda nos lus.
Forma proseshon, rama den man,
kana te na kachunan di altá.
28Bo ta mi Dios, mi ke gradisí Bo,
mi ke alabá Bo, mi Dios.
29Duna grasia na SEÑOR, komo E ta bon:
— su amor ta eterno!
Who We AreWhat We EelieveWhat We Do
2025 by iamachristian.org,Inc All rights reserved.
