1Mi di: Laga mi warda mi kurpa
pa mi no hasi piká ku mi lenga;
mi ke bisti mi boka un bosal,
tanten ku tin malbado mi dilanti.
2Mi a keda ketu, resigná,
mi a wanta mas ku ta'ta bon,
ma mi doló a bira mas pisá.
3Mi kurason tabata kima den mi pechu,
ku m'a pensa un kos — kandela;
te ku mi lenga a lòs i m'a bisa:
4‘SEÑOR, laga mi sa mi fin,
kuantu dia mas mi tin di bida;
laga mi sa kon pasahero mi ta.
5Esta kòrtiku Bo a hasi mi dianan,
mi bida no ta nada den bo bista,
hende bibu no ta mas ku un rosea;
6hende ta pasa manera un sombra,
tur su anshamentu ta pòrnada;
e ta montoná semper mas tantu,
pero e no sa ta pa ken.
7Señor, kiko mi spera awor?
Ta den Bo mi a pone mi speransa.
8Libra mi di tur mi pikánan,
no laga un loko tuma mi hasi kèns.
9Mi ta ketu, mi n' ta habri mi boka,
n' ta bo man a hasi tur esei?
10Kita bo kastigu fo'i mi,
mi ta rendí pa gòlpi di bo man.
11Kastigando kulpa di hende
Bo ta dun'é skremènt;
manera mòt Bo ta kome su ilushon;
hende no ta mas ku un rosea.
12SEÑOR, skucha mi orashon,
hasi kaso di mi gritu di ousilio;
no keda surdu pa mi kehonan.
Mi no ta un wéspet serka Bo?
Ta serka Bo mi ta biba,
manera ántes ayá tur mi grandinan.
13Kita bo bista severo fo'i mi,
laga mi bolbe hala rosea
promé ku mi bai i lo n' t'ei mas.’
Who We AreWhat We EelieveWhat We Do
2025 by iamachristian.org,Inc All rights reserved.
