Tobit 6 - Papiamentu Bible with DC 2013(PBDC13)

Na kaminda

1E mucha a bai kompañá pa e angel. E kachó tambe a sali i a bai ku nan. Nan a kuminsá nan biahe i e promé anochi nan a lanta nan tènt na Riu Tigris.

2Tobias a drenta e riu pa dal un baño. Diripiente un piská grandi a bula sali for di e riu i ker a guli un pia di e mucha hòmber. E mucha a dal un gritu.

3Pero e angel a bis'é: ‘Kohe e piská ei tene!’ E mucha hòmber a kohe e piská i a bent'é riba tera.

4E angel a bis'é: ‘Habri e piská, saka kurason, higra i hal warda nan bon. Hal, kurason i higra di piská ta bon remedi. Tira sobrá shirishiri afó.’

5E mucha a habri e piská i a pone hal, higra i kurason un banda. Despues el a hasa pida di e piská i a kom'é. El a salga sobrá i ward'é.

6Nan dos a sigui nan kaminda te ora nan a yega serka di Media.

7E ora ei e mucha hòmber a bisa e angel: ‘Ruman Azarías, pakiko higra, kurason i hal di e piská ta sirbi?’

8Azarías a kontest'é: ‘Ora un demoño òf spiritu malu ta ataká un hende hòmber òf un hende muhé, mester kima e kurason i e higra kaminda e hende ta. E ora ei e spiritu lo stòp ku e atake i nunka mas e no ta ripití.

9I si un hende tin un flishi blanku riba su wowo, si hunta e wowo ku hal i supla den dje, e ora ei lo e kura.’

10Ora nan a drenta Media i tabata serka di yega Ekbátana,

11angel Rafael a bisa e mucha hòmber: ‘Ruman Tobias.’ ‘Ata mi akí!’ el a rospondé. E angel a bis'é: ‘Nos mester keda awe nochi na kas di Raguel, e ta bo famia. E tin un yu muhé, ku yama Sara.

12E no tin yu hòmber ni otro yu muhé, solamente Sara. Abo tin mas derechi ku ningun otro hende di kasa kuné i t'abo mester heredá propiedat di su tata. E ta un mucha muhé inteligente, ku kurashi i bunita. Su tata ta un gran hòmber.

13Abo mester pidi su man. Skucha mi, ruman, awe nochi mi ta bai papia ku e tata tokante di e hobensita pa nos pidi su man pa bo. Antó nos lo selebrá fiesta di kasamentu ora nos bini bèk for di Rages. Mi ta sigur ku Raguel lo no nenga di kas'é ku bo i ku Raguel nunka lo no kasa su yu muhé ku un hòmber ku no ta hudiu: esei lo kost'é su bida segun lei di Moises. E sa ku t'abo ta bini na remarke pa kasa kuné promé ku tur otro. Pues skucha mi, ruman, awe nochi mes nos ta bai papia tokante e hobensita i nos ta regla e kompromiso. I ora nos regresá for di Rages nos ta selebrá boso kasamentu i nos ta bai kas ku e hobensita.’

14Tobias a bisa Rafael: ‘Ruman Azarías, mi a tende ku nan a kasa e mucha muhé ku shete hòmber kaba, pero ku tur a muri den e kamber matrimonial, ora nan ker a tene relashon kuné. Tambe tin bisá ku ta un demoño ta mata nan.

15E demoño no ta hasi Sara ningun daño, pero ken ku ke aserká Sara e ta mata. Mi ta úniko yu di mi tata. Awor mi tin miedu pa mi no muri i pone mi mama i tata muri di pena pa mi, nan no tin mas yu hòmber pa dera nan morto.’

16E angel a bis'é: ‘Bo no ta kòrda e palabranan ku bo tata a bisa bo ora el a manda bo skohe un kasá for di bo mes pueblo? Skucha, mi ruman, kasa kuné i no preokupá ku e demoño ei: mi sa ku awe nochi lo bo drumi ku Sara.

17Ora bo drenta e kamber matrimonial, kohe e skalchi ku sensia i pone pida di e kurason i pida di e higra di e piská riba e shinishi kayente i laga nan kima. E holó lo plama den e kuartu i ora e demoño sinti e holó, e ta hui bai pa no bolbe nunka mas serka dje.

18Pero na ora di uni ku Sara, para huntu i hasi orashon i pidi SEÑOR di shelu tene mizerikòrdia ku boso i protegé boso. No tene miedu, pasobra Sara tabata destiná pa bo for di tur tempu. Abo lo hasié felis. Lo e bai ku bo i mi ta kere ku lo e bira mama di bo yunan. Lo bo stima nan mashá. No preokupá.’

19Ora Tobias a tende Rafael bisa ku Sara tabata su famia di parti di tata, el a sinti stimashon pa Sara i a pega su kurason n'e.