1 Krónikanan 13 - Papiamentu Bible with DC 2013(PBDC13)

David ta buska e arka di aliansa na Kiriat-Yearim(2 Samuel 6:1-11)

1David a konsultá ku tur e hefenan di mil i di shen sòldá, esta ku kada komandante.

2Ora henter Israel tabata reuní, el a bisa: ‘Si boso ta bai di akuerdo ku mi i si ta boluntat di SEÑOR, laga nos manda mensahero tur parti di Israel. Nan mester bisa nos kompatriotanan ku no ta presente aki pa nan bini serka nos. E saserdotenan i e levitanan, ku ta biba na e lugánan destiná pa nan, tambe mester bini.

3Mi ta proponé pa nos hiba e arka di aliansa di nos Dios Herusalèm, pasobra den tempu di Saul nos no a paga atenshon n'e.’

4Tur hende den e reunion a haña ku ta un bon idea i nan a disidí di hasi asina.

5Di e manera ei David a reuní tur israelita for di riu Nilo na Egipto den zùit te na Lebo-Hamat den nort, pa trese e arka di Dios for di Kiriat-Yearim.