1[24] Ary izy telo lahy, i Hananià sy i Hazarià ary i Misaela, dia nandehandeha tao anaty lelafo nanao hira fiderana sy fisaorana ny Tompo Andriamanitra.
2[25] Raha mbola nitsangana tao afovoan’ny afo i Hazarià, dia nanao izao vavaka izao:
3[26] «Ry Tompo Andriamanitry ny razanay ô,
hisaorana sy hoderaina anie Ianao,
ary homem-boninahitra mandrakizay anie ny anaranao!
4[27] Satria marina Ianao
amin’izay rehetra nataonao.
Marina avokoa ny asanao,
mahitsy ny lalanao
ary ara-drariny ny fitsarànao.
5[28] Eny, didim-pitsarana tsy miangatra ny anao
tamin’izay rehetra nanafaizanao anay,
dia ny tenanay sy i Jerosalema,
ilay tanàna masin’ny razanay;
satria araka ny marina sy ny hitsiny
no nanaovanao izany rehetra izany,
dia noho ny amin’ny helokay ihany.
6[29] Fa nahavita heloka izahay
sy nanao ratsy ka nihataka taminao,
ary diso tamin’ny zavatra rehetra.
7[30] Tsy nankatò ny didinao izahay,
ka tsy nitandrina na nahatanteraka izany
araka ny nandidianao anay
mba hahitanay soa avy aminy.
8[31] Izay rehetra nanafaizanao anay
sy izay rehetra nataonao taminay
dia araka ny fitsaranao ara-drariny.
9[32] Natolotrao izahay ho eo an-tanan’ny fahavalo
izay olon-dratsy mahatsiravina sady mpikomy aminao.
ary ho eo ambany fahefàn’ny mpanjaka iray
faran’izay tsy marina indrindra eto an-tany.
10[33] Ary ankehitriny mikombom-bava izahay
mpanomponao sy mpivavaka aminao
fa sady menatra no afa-baràka.
11[34] Koa noho ny amin’ny lazanao,
dia aza mahafoy anay tanteraka
ary aza foananao ny fanekempihavananao.
12[35] Aza esorina aminay ny fitiavanao
noho ny amin’i Abrahama sakaizanao
sy i Itsehàka mpanomponao
ary i Israely voatokana ho Anao.
13[36] Samy nampanantenainao ireo
fa homenao taranaka maro
tahaka ny kintana eny amin’ny lanitra
na toy ny fasika eny amoron-dranomasina.
14[37] Kanefa, Tompo ô, noho ny helokay
dia tonga firenena bitika indrindra
amin’ny firenen-drehetra izahay
ary vahoaka voaetry ankehitriny
eto ambonin’ny tany tontolo.
15[38] Amin’izao fotoana izao dia tsy anananay
na filoha na mpaminany na mpitarika;
tsy afa-manao sorona dorona manontolo izahay
na sorona hafa amam-panatitra
na fandoroana vovo-javamanitra,
na toerana fanaterana ny voaloham-bokatra
mba handraisanay famelàn-keloka aminao.
16[39] Kanefa raiso izahay, Tompo ô,
amin’izao avonavonay efa torotoro
sy fanahinay feno fietrena izao,
17[40] raiso tahaka ny ondrilahy sy ombilahy
izay fanaonay sorona dorana manontolo;
ho toy ny zanak’ondry matavy an’arivony anie
ny sorona atolotray Anao ankehitriny;
ary hanaraka Anao hatrany anie izahay,
satria tsy ho menatra izay matoky Anao.
18[41] Ankehitriny no amehezanay tena
hanaraka Anao amin’ny fonay manontolo,
ka sady hanaja Anao izahay
no hitady ny fanatrehanao.
19[42] Koa aza avela ho afa-baràka izahay,
fa ento araka ny fiantranao
sy araka ny indrafonao tsy hita lany.
20[43] Vonjeo araka ny asanao mahagaga izahay,
ka ny anaranao, Tompo ô, no omeo voninahitra.
21[44] Enga anie ho menatra sy ho afa-baràka
izay rehetra manisy ratsy anay mpanomponao;
enga anie tsy hisy fahefana anananay intsony
ary ho voamontsamontsana ny heriny.
22[45] Aoka ho fantany fa Ianao
no hany Tompo Andriamanitra
sady omem-boninahitra amin’ny tany tontolo!»
Ny hiran’ny sakaizan’i Davida telo lahy23[46] Fa ireo mpanompon’ny mpanjaka izay nanipy azy telo lahy tao amin’ny fatana fandrendrehana, dia tsy nitsahatra nisorona ny afo tamin’ny tara sy ditin-kazo ary hoto aman-kitay;
24[47] koa nijoalajoala tany amin’ny 24 metatra sy sasany ambonin’ny fatana ny lelafo.
25[48] Nidedadeda aoka izany nanodidina ny fatana ny afo ka nandoro hatramin’ireo Babilônianina nanakaiky izany.
26[49] Fa nidina tao amin’ny fatana niaraka tamin’i Hazarià sy ireo namany ny anjelin’ny Tompo ka nanosika ny lelafo ho any ivelan’ny fatana.
27[50] Dia nisy toa rivotra malefaka nitsoka teo afovoan’ny fatana, ka tsy nahakasika na nandratra azy ireo kely akory ny afo.
28[51] Koa toy ny vava iray ihany izy telo lahy tao anaty fatana no indray nidera sy nankalaza ary nisaotra an’Andriamanitra ka nanao hoe:
29[52] «Hisaorana anie Ianao,
ry Tompo Andriamanitry ny razanay,
fa mendrika dera sy laza mandrakizay.
Hisaorana anie ny anaranao
izay masina sy be voninahitra
fa mendrika dera sy laza mandrakizay.
30[53] Hisaorana anie Ianao
an-tempolinao masina sy be voninahitra,
fa mendrika dera sy voninahitra mandrakizay.
31[54] Hisaorana anie Ianao
Izay mipetraka eo ambonin’ny kerobima
sy mijery ny fanambanin’ny hantsana,
fa mendrika dera sy laza mandrakizay.
32[55] Hisaorana anie Ianao
eo amin’ny sezafiandriananao,
fa mendrika dera sy laza mandrakizay.
33[56] Hisaorana anie Ianao
eo ambonin’ny andohalambon’ny lanitra,
fa mendrika dera sy voninahitra mandrakizay.
34[57] Misaora ny Tompo ianareo rehetra asany;
derao Izy ary ankalazao mandrakizay.
35[58] Misaora ny Tompo, ianareo lanitra;
derao Izy ary ankalazao mandrakizay.
36[59] Misaora ny Tompo, ianareo anjeliny;
derao Izy ary ankalazao mandrakizay.
37[60] Misaora ny Tompo ianareo rano
mivangongo any ambonin’ny lanitra;
derao Izy ary ankalazao mandrakizay.
38[61] Misaora ny Tompo, ianareo rehetra herin’ny lanitra;
derao Izy ary ankalazao mandrakizay.
39[62] Misaora ny Tompo, ianareo masoandro sy volana;
derao Izy ary ankalazao mandrakizay.
40[63] Misaora ny Tompo, ianareo kintan’ny lanitra;
derao Izy ary ankalazao mandrakizay.
41[64] Misaora ny Tompo, ianareo orana aman’ando rehetra;
derao Izy ary ankalazao mandrakizay.
42[65] Misaora ny Tompo, ianareo rivotra rehetra;
derao Izy ary ankalazao mandrakizay.
43[66] Misaora ny Tompo, ianareo afo sy hafanana;
derao Izy ary ankalazao mandrakizay.
44[67] Misaora ny Tompo, ianareo hatsiaka sy hafanà-migaingaina;
derao Izy ary ankalazao mandrakizay.
45[68] Misaora ny Tompo, ianareo ando amam-patrakala;
derao Izy ary ankalazao mandrakizay.
46[69] Misaora ny Tompo, ianareo andro sy alina;
derao Izy ary ankalazao mandrakizay.
47[70] Misaora ny Tompo, ianareo hazavana sy haizina;
derao Izy ary ankalazao mandrakizay.
48[71] Misaora ny Tompo, ianareo fanala sy hatsiaka;
derao Izy ary ankalazao mandrakizay.
49[72] Misaora ny Tompo, ianareo ranomandry sy oram-panala;
derao Izy ary ankalazao mandrakizay.
50[73] Misaora ny Tompo, ianareo tselatra sy rahona;
derao Izy ary ankalazao mandrakizay.
51[74] Aoka ny tany hisaotra ny Tompo;
aoka izy hidera sy hankalaza Azy mandrakizay.
52[75] Misaora ny Tompo, ianareo tendrombohitra sy havoana;
derao Izy ary ankalazao mandrakizay.
53[76] Misaora ny Tompo, ianareo rehetra zava-maniry amin’ny tany;
derao Izy ary ankalazao mandrakizay.
54[77] Misaora ny Tompo, ianareo ranomasina sy ony;
derao Izy ary ankalazao mandrakizay.
55[78] Misaora ny Tompo, ianareo loharano;
derao Izy ary ankalazao mandrakizay.
56[79] Misaora ny Tompo, ianareo hazandrano;
na vaventy na madinika;
derao Izy ary ankalazao mandrakizay.
57[80] Misaora ny Tompo, ianareo voro-manidina;
derao Izy ary ankalazao mandrakizay.
58[81] Misaora ny Tompo, ianareo biby dia sy fiompy;
derao Izy ary ankalazao mandrakizay.
59[82] Misaora ny Tompo, ianareo zanak’olombelona;
derao Izy ary ankalazao mandrakizay.
60[83] Misaora ny Tompo, ianareo Israelita;
derao Izy ary ankalazao mandrakizay.
61[84] Misaora ny Tompo, ianareo mpisorony;
derao Izy ary ankalazao mandrakizay.
62[85] Misaora ny Tompo, ianareo mpanompony;
derao Izy ary ankalazao mandrakizay.
63[86] Misaora ny Tompo, ianareo fanahy aman-tsain’olo-marina;
derao Izy ary ankalazao mandrakizay.
64[87] Misaora ny Tompo, ianareo masina sy mietry ao am-po;
derao Izy ary ankalazao mandrakizay.
65[88] Misaora ny Tompo, isika;
ry i Hananià sy i Hazarià ary i Misaela;
derao Izy ary ankalazao mandrakizay,
fa nafahany tamin’ny toeran’ny maty isika
sy novonjeny tamin’ny vahohon’ny fahafatesana
ary nesoriny teo anivon’ny fatana mivaivay
sy notsoahany teo afovoan’ny afo.
66[89] Misaora ny Tompo fa tsara Izy
ary maharitra mandrakizay ny fitiavany.
67[90] Misaora ny Tompo Andriamanitry ny andriamanitra,
ianareo rehetra mpivavaka aminy;
derao Izy ary ankalazao
fa maharitra mandrakizay ny fitiavany.»
Who We AreWhat We EelieveWhat We Do
2025 by iamachristian.org,Inc All rights reserved.
