Isaià 27 - Malagasy Bible Interconfessionelle

Fandresena an’ilay dragona an-dranomasina

1Amin’izany andro izany, dia hirotsaka an-tsehatra ny TOMPO ka handray sabatra mafy sady lehibe no mahery hamelezana ny Leviatana, ilay bibilava mitsoriaka sy mihorongorona; ary hovonoin’ny Tompo izany dragona an-dranomasina izany.

Ny Tompo sy ny voalobony

2Amin’izany andro izany no andredony hira

momba ny voaloboka manome divay tsara hoe:

3«Izaho TOMPO no mpiaro azy

ka manondraka azy amin’ny fotoana sahaza;

ambenako izy na andro na alina

fandrao misy manimba.

4Tsy tezitra aminy intsony Aho,

kanefa aoka tsy hisy tsilo na songosongo ao;

hongotako sy hodorako avokoa ireny!

5Fa izay mifikitra eo ambany fiarovako

no hamitram-pihavanana amiko;

eny, hamitram-pihavanana amiko izy.

Famelana ny helok’i Israely; ilay tanàna nilaozana

6Amin’ny andro ho avy,

dia hanan-tsimoka vaovao ny vahoakan’i Jakôba

ary hamony hivelatra indray i Israely.

ka hameno izao tontolo izao ny voany.

7Nokapohin’ny Tompo ireo nikapoka ny vahoakany;

toy izany koa ve no nikapohan’ny Tompo ilay vahoakany?

Naripaky ny Tompo ireo nandripaka ny vahoakany;

toy izany koa ve no nandripahan’ny Tompo ilay vahoakany?

8Tsia, fa nohelohiny hatao sesitany izy

ka halefa any am-pahababoana,

nopaohiny tamin’ny rivo-mahery,

dia tamin’ny andron’ny rivotra avy any atsinanana.

9Fa ankehitriny dia toy izao no hamelàna

ny heloka vitan’ireo taranak’i Jakôba,

ary izao no ho vokatry ny famelana ny fahotany:

hopotehiny toy ny vato sokay voatorotoro

ny vato rehetra eo amin’ny alitara,

ary tsy havelany hitsangana intsony

na ny tsatokazo fanajana an’i Aserà

na ny fandoroana vovo-javamanitra.

10Tsy hisy olona intsony ao an-tanànamimanda

fa ho foana sy ilaozana toy ny taniefitra izany,

ka ho lasa toeram-piraofan’ny zanak’omby,

handriany sy hihinanany ravin-kazo.

11Rehefa maina ny rantsan-kazo, dia hotapahina;

ary ho avy ny vehivavy ka handoro azy.

Tsy manam-pahalalana tokoa ity firenena ity

ka tsy hiantran’ilay Mpahary azy,

sady tsy hangorahan’ilay Mpamorona azy.

Fodiana rodomben’ireo voasesitany

12Amin’izany andro izany,

dia hovelesin’ny TOMPO ireo salohim-bary voajinja

manomboka eo amin’ny ony Eofrata

ka hatrany amin’ny ranon-driakan’i Ejipta.

Amin’izay ianareo, ry Israelita,

dia samy hotsimponina tsirairay.

13Amin’izany andro izany,

dia hanakoako ny feon’ny anjomara lehibe;

ka ho tonga avokoa ireo very tany Asiria

na ireo tafaely tany Ejipta

mba hiankohoka eo anatrehan’ny TOMPO

ao an-tendrombohitra masina any Jerosalema.