1Fa ankehitriny kosa mihainoa,
ry firenen’i Jakôba mpanompoko,
ry vahoaka Israely izay nofidiko.
2Izaho TOMPO izay mpanao anao,
ka namorona anao hatrany am-bohòka
sy manampy anao no indro milaza aminao hoe:
Aza matahotra, ry firenen’i Jakôba mpanompoko
ilay Jesoròna izay nofidiko.
3Fa hanosaka rano amin’izay mangetaheta Aho
sy hampandriaka renirano amin’ny tany mangentana.
Hatosako amin’ny zanakao ny Fanahiko
ary amin’ny taranakao ny fitahiako.
4Handrobona toy ny solofom-bolotara
na toy ny hazomalahelo eny amoron-drano izy.
5Ny anankiray hanao hoe: ‹An’ny TOMPO aho›;
ny iray hafa te hitondra ny anaran’i Jakôba.
Ny anankiray kosa dia eo amin’ny sandriny
no hanoratany hoe: ‹Fananan’ny TOMPO›
sady ny anaran’i Israely no hireharehany.»
Fihantsiana ny andriamani-tsiizy6Izao no lazain’ny TOMPO
dia ilay TOMPOn’izao rehetra izao
sady Mpanjakan’i Israely sy Mpanavotra azy:
«Izaho no voalohany ary Izaho no farany,
ka tsy misy Andriamanitra afa-tsy Izaho.
7Raha misy mihambo ho mitovy amiko,
aoka izy hiteny sy handahatra momba izany!
Hohazavainy amiko hoe iza, hatry ny fahagola,
no nampandre ny zavatra tsy maintsy tonga;
ary hambarany amintsika koa ny zavatra ho avy.
8Aza mangovitra na matahotra ianareo, ry vahoakako.
Tsy Izaho ve no nampandre anareo
ka nanambara izany taminareo hatry ny ela?
Ianareo tokoa no vavolombeloko
fa tsy misy Andriamanitra afa-tsy Izaho.
Eny, tsy misy vatolampy hafa,
tsy misy fantatro na iray aza.»
Ny mpanamboatra sampy9Zava-poana avokoa ny mpanao sarivongan-tsampy
ary tsy mahasoa akory ny zavatra lalainy:
Ny sarivongan-tsampy no vavolombelona ho azy,
kanefa vavolombelona tsy mahita akory,
ary tsy mahalala na inona na inona
ka handiso fanantenana azy.
10Iza no hanamboatra andriamani-tsiizy,
handrendrika sarivongana tsy mahasoa akory?
11Indreo ho menatra izay rehetra mpomba azy
fa olombelona ihany no namboatra ireny!
Avelao hivory sy hiseho izy rehetra,
fa hatahotra sy ho safo-kenatra avokoa.
12Ny mpanefy manapaka takela-by,
dia mandefa azy ao anaty afo
sy mamolavola azy amin’ny tantanana
ka miasa amin’ny sandriny mahery;
avy eo dia noana sy ketraka izy,
tsy misotro rano ka reraka.
13Ny mpandrafitra kosa mandrefy hazo amin’ny tady
sy manamarika azy amin’ny tsaoka,
manamboatra azy amin’ny vankona,
manamarika azy amin’ny kômpà
ary manome azy endrik’olona,
dia endrik’olona tsara tarehy
izay hapetraka ao amin’ny tempoly anankiray.
14Avahana ny hazo sedera hokapaina,
fidîna ny hazo terebinta na ôaka,
dia avela ho lehibe any an’ala.
Na ny hazo kesika volena koa,
dia ny ranonorana no mampaniry azy.
15Ireny no ampiasain’ny olona ho kitay
ka angalany hamindroana na handrahoan-tsakafo.
Ireny ihany koa no anaovany
andriamanitra hiankohofany
sy sarivongan-tsampy hivavahany.
16Araka izany ny antsasaky ny vatan-kazo
dia dorana amin’ny afo ka itonoany hena;
manatsatsika hena ny olona ka voky,
na mamindro koa izy ka manao hoe:
«Andray! Mafana aho izany! Nahita afo aho!»
17Ny antsasaky ny vatan-kazo kosa
anamboarany andriamanitra ho sampiny.
Dia izany no iondrehany sy iankohofany
sady ivavahany ataony hoe:
«Vonjeo aho fa ianao no andriamanitro.»
18Tsy mahalala na inona na inona
sady tsy misaina ireny olona ireny,
voatampina ny masony ka tsy mahita
sady donto rahateo koa ny fony.
19Tsy misy mieritreritra ao am-pony
na mba mahalala handini-tena hoe:
«Ny antsasak’ity vatan-kazo ity
dia nodorako tamin’ny afo;
ka ny vainafony no nanendasako mofo
sy nanatsatsihako hena hohaniko.
Ny antsasaky ny vatan-kazo kosa
dia hanaovako sampy mamoafady,
ka tapa-kazo no indro hiankohofako.»
20Mifikitra amin-javatra lasan-ko lavenona ireny;
ny fony voafitaka no nampivily azy.
Tsy mahafaka azy ny andriamaniny,
kanefa ny tenany koa tsy mahateny hoe:
«Hay moa ka andriamani-tsiizy
ity eto an-tanako ankavanana ity!»
Aza hadino fa mpanompoko ianao21Ry firenen’i Jakôba, ry vahoaka Israely,
aoka hotsarovanao izao: «Mpanompoko ianao!
Izaho no namolavola anao hanompo Ahy.
Tsy hohadinoiko ianao, ry vahoaka Israely!
22Nofafako toy ny rahona ny fahadisoanao
ary nolevoniko toy ny zavona ny fahotanao.
Koa miverena amiko ianao fa efa navotako.»
23Miasa ny TOMPO ka mihobia, ry lanitra,
ary miravoravoa, ry fanambanin’ny tany.
Ataovy manako ny hoby, ry tendrombohitra
mbamin’ny ala sy ny hazo rehetra ao,
fa ny TOMPO efa nanavotra ny firenen’i Jakôba
ary efa naneho voninahitra tamin’ny vahoaka Israely.
Ilay Mpamorona izao tontolo izao no mifehy ny tantara24Ry vahoaka Israely, ny TOMPO Izay nanavotra anao,
Ilay namorona anao hatrany am-bohòka,
dia indro milaza aminao hoe:
«Izaho TOMPO no manao ny zavatra rehetra,
Izaho irery ihany no nanenjana ny lanitra
sy namelatra ny tany fa tsy nisy nanampy.
25Koa hataoko tsy misy vokany
ny famantarana vitan’ny mpimasy
ary hataoko mirediredy ny mpisikidy;
hataoko mianòtra ny olon-kendry
ka hody fahadalana ny fahalalàny.
26Fa homeko lanjany ny tenin’ireo mpanompoko
ary hataoko tanteraka ny fikasan’ireo irako.
Ka hoy Aho amin’i Jerosalema:
‹Aoka honenana indray ianao.›
ary amin’ny tanànan’i Joda hoe:
‹Aoka haorina indray ianareo.›
Eny, hatsangako izay efa rava.
27Hoy Aho amin’ny ranomasina lalimbe:
‹Aoka ho maina ianao,
fa horitiko ny ranobenao.›
28Hoy Aho ny amin’i Kirôsa:
‹Izy no mpiandry ondriko.
Hotanterahiny izay sitrako rehetra,
ka dia hanome baiko izy
mba haorina indray i Jerosalema
ary hamboarina indray ny tempoly.› »
Who We AreWhat We EelieveWhat We Do
2025 by iamachristian.org,Inc All rights reserved.
