Salamo 2 - Malagasy Bible Interconfessionelle

SALAMO Ilay mpanjaka voahosotr’Andriamanitra

1Nahoana no mihotakotaka ny firenena?

Ireo vahoaka mikomy amin’ny tsinontsinona;

2ireo mpanjakan’ny tany miomana hiady;

ireo andriana miara-mioko

hanohitra ny TOMPO sy ilay Mesiany.

3«Aoka hotapahintsika, hoy ireo, ny gadra angejàny;

ary hariantsika any izay fanjakazakàny!»

4Ny Tompo Izay mipetraka any an-danitra kosa

dia mihomehy azy sy maneso azy.

5Ka itenenany amin-katezerana ireo

sy ampihorohoroiny amin-kavinirana hoe:

6«Izaho no manendry Azy ho mpanjaka

eo Tsiôna tendrombohitro masina!»

7–Aoka hambarako, hoy ilay mpanjaka,

ny didy navoakan’ny TOMPO;

fa hoy Izy tamiko: «Ianao no zanako;

Rainao niteraka anao Aho manomboka anio.

8Koa angataho amiko ny firenena rehetra,

dia homeko ho fanananao ireny

hatrany amin’ny faravazan-tany,

9ary hofehezinao amin’ny tehim-by

ka ho azonao potehina toa vilany tany.»

10Koa misehoa ho hendry, ianareo mpanjaka;

ary minoa anatra, ry mpitsara ny tany.

11-12Tompoy amin-tahotra ny TOMPO

ary ekeo amin-kovitra ny fahefàny,

fandrao hirehitra tampoka ny hatezerany

ka ho fatin’ny fikasanareo ianareo.

Sambatra izay rehetra mialoka aminy.