1Ity boky ity dia mirakitra ny asa sy teny nataon’i Jeremià, zanakalahin’i Hilkià isan’ny mpisorona tao Hanatôta, tanàna iray tamin’ny faritanin’i Benjamîna.
2Nampitondrain’ny TOMPO an’i Jeremià ireo hafatra ireo, nanomboka ny taona faha-13 nanjakan’i Jôsià, zanakalahin’i Amôna sady mpanjakan’i Joda,
3sy tamin’ny andron’i Jôiakima, zanakalahin’i Jôsià sady mpanjakan’i Joda, ka hatramin’ny taona farany nanjakan’i Tsedekià, zanakalahin’i Jôsià iray hafa koa; io taona io dia ny faha-11 nanjakan’i Tsedekià tamin’ny volana fahadimy, fony lasan-ko babo ny mponina tao Jerosalema.
Ny fiantsoana an’i Jeremià ho mpaminany4Nisy tenin’ny TOMPO tamiko nanao hoe:
5–Mbola tsy noforoniko
tao an-kibon-dreninao akory ianao
dia efa fantatro,
ary mbola tsy teraka akory ianao
dia efa natokako hanompo Ahy
sy notendreko ho mpaminany
ho an’ny firenena maro.
6Ary namaly aho hoe:
–Indrisy, ry Tompo ANDRIANANAHARY ô,
mbola tanora loatra aho
ka tsy mahay mandahateny.
7Fa hoy ny TOMPO tamiko hoe:
–Aza manao hoe «mbola tanora loatra aho»
fa tsy maintsy handeha
amin’izay rehetra hanirahako anao ianao
ka hilaza aminy
izay rehetra nandidiako anao.
8Aza matahotra azy
fa miaraka anao Aho mba hanafaka anao.
Izany no teny hentitry ny TOMPO tamiko.
9Avy eo IZY dia nandroso ny tanany
ka nanendry ny vavako
ary nilaza tamiko hoe:
–Ianao no hanambara ny teniko.
10Jereo fa omeko fahefana ianao anio
amin’ireo firenena sy fanjakana
mba hanongotra sy hanjera,
hanapotika sy handrava,
ary hanorina sy hamboly.
Ny rantsam-paiso sy ny vilany mangotraka11Ary nisy tenin’ny TOMPO tamiko nanontany hoe:
–Inona no hitanao, ry Jeremià?
Dia novaliako hoe:
–Rantsam-paiso na hazo mahatsiaro no hitako.
12Ary hoy ny TOMPO tamiko:
–Nahita tsara ianao, fa hahatsiaro Aho mba hanatanteraka izay lazaiko.
13Dia mbola nisy tenin’ny TOMPO tamiko nanontany hoe:
–Ary inona no hitanao izao?
Dia novaliako hoe:
–Vilany mangotraka no hitako; avy any avaratra no mitongilana mankatỳ ny vavany.
14Ary hoy ny TOMPO nanazava tamiko:
–Avy any avaratra tokoa
no hipoitra ny loza
hamelezana ny mponina rehetra eto amin’ny tany.
15Fa Izao TOMPO dia miteny hentitra hoe:
Hantsoiko ny fokom-pirenena rehetra
amin’ireo fanjakana any avaratra.
Ho avy ireny ka samy hametraka
ny sezafiandrianan’ny mpanjakany avy
eo anoloan’ny vavahadin’i Jerosalema.
Hanodidina ny mandany rehetra izy
ary hanafika ny tanàn-dehibe rehetra any Joda.
16Havoakako ny didim-pitsarana
hamelezana ny mponin’ity tany ity
noho ny ratsy rehetra izay nataony:
nandao Ahy izy ka nanao sorona
ho an’ireo andriamani-kafa,
dia ny andriamanitra asan-tanany izay ivavahany!
17Fa ianao kosa, ry Jeremià, misikìna,
mitsangàna ka ambarao azy
izay rehetra nandidiako anao.
Aza matahotra azy ianao
fandrao hataoko raiki-tahotra eo anatrehany.
18Manomboka izao dia hataoko mafy
toy ny tanànamimanda ianao
sy toy ny andry vy ary toy ny manda varahina
raha mifanandrina amin’ny mponina rehetra
eto amin’ny tany
amin’ny mpanjakan’i Joda
sy ireo mpitondra fanjakana sy ny mpisorona
ary ny sarambabem-bahoaka ao amin’ny tany.
19Hiady aminao izy nefa tsy haharesy anao,
fa miaraka aminao Aho mba hanafaka anao.
Teny hentitra avy amiko TOMPO izany.
Who We AreWhat We EelieveWhat We Do
2025 by iamachristian.org,Inc All rights reserved.
