1Manaraka an’i Samoela, dia niseho i Natàna
mba ho mpaminany tamin’ny andron’i Davida.
2Toy ny fanavahana ny jabora tamin’ny sorom-pihavanana
no nanavahana an’i Davida teo amin’ny Israelita.
3Kilalao ho azy ny miatrika liona na orsa
mova tsy ny mandray osikely na ondrikely.
4Mbola tanora izy no namono ilay lehilahy goavana,
ka nanaisotra ny latsa tamin’ny vahoaka israelita;
nahodiny mirimorimo ny antsamotady nisy vato
ka nahalavo an’i Gôliata mpirehaka.
5Nantsoin’i Davida ny Tompo Avo Indrindra
ka nanome tanjaka ny tanany ankavanana
mba hamono hahafaty an’ilay mpiady kinga
sy hanandratra ny herin’ny fireneny.
6Izany no nanomezam-boninahitra an’i Davida
tamin’ny famonoany fahavalo an’alinalina;
tao anatin’ny fisaorana ny Tompo no niderana azy,
ary dia natolotra azy ny diademam-piandrianana.
7Nataony ringana hatraiza hatraiza ny fahavalo
ary nomontsaniny ny Filistinina mpanohitra azy
ka nopotehiny mandraka androany ny heriny.
8Tamin’ny asa rehetra nataon’i Davida, dia teny fiderana
no nanolorany haja an’ilay Masina sady Avo Indrindra;
tamin’ny fony manontolo no nihirany salamo
sy nitiavany an’Ilay Mpahary azy.
9Nanendry antoko-mpihira teo anoloan’ny alitara izy,
ka feon-kira mahafinaritra no nampandrenesin’ireny.
10Nomeny endrika manetriketrika ny fety
ary narindrany ho tapitra ohatra ny fankalazana
mba hideran’ny olona ny anara-masin’ny Tompo
sy hampanakoako ny Toeramasina dieny vao maraina.
11Ny Tompo kosa namela ny fahotan’i Davida
sy nanandratra ny fahefàny ho mandrakizay
ary nanome azy ny taranaka ho mpanjaka mifanesy
mbamin’ny sezafiandrianana be voninahitra
eo amin’i Israely.
I Salômôna mpanjaka12Manaraka an’i Davida, dia niseho ilay zanany hendry
izay niaina tanaty faritra malalaka, noho ny amin-drainy.
13Nanjaka tamin’ny androm-piadanana i Salômôna
satria nomen’Andriamanitra fitsaharana izy
teo amin’ny sisin-tany rehetra manodidina,
mba hanaovany trano voatokana ho an’ny anarany
sy hanamboarany Toeramasina mandrakizay.
14Endrey ny fahendrenao, ry Salômôna,
fony ianao mbola tanora;
endrey izato ianao feno fahalalana
tahaka ny ony feno rano!
15Nitatra manerana ny tany ny fahiratan-tsainao;
nofenoinao ohabolana sy ankamantatra ny sehatra rehetra.
16Ny lazanao tonga hatrany amin’ny nosy lavitra;
ary ny fiadanana omenao no nitiavan’ny olona anao.
17Nigagan’ny tany samihafa ianao
noho ny hiranao masina sy ny ohabolanao
ary ny fanoharanao sy ny valin-teninao.
18Araka ny anaran’Andriamanitra mendri-kaja
izay nantsoina tamin’ny vahoaka Israely
no nanomezana anarana anao.
Nanangona volamena tahaka ny fanangona fira-potsy ianao
ary nanavosa volafotsy tahaka ny fanavosa firaka.
19Kanefa nanaram-po tamin’ny vehivavy ianao
ary nitolo-batana handevozin’izy ireny.
20Izany no nanisy pentina ny voninahitrao
sy nandotoanao ny voninahitr’ireo taranakao
ka nahatonga ny fahatezeran’Andriamanitra taminy.
Nampangirifiry azy tokoa ny fahadalànao,
21satria lasa nivaky roa ny fanjakanao;
ka avy amin’ny fokon’i Efraîma
no nipoiran’ilay fanjakana nikomy.
22Kanefa ny Tompo tsy nampitsahatra ny famindrampony
ary tsy namela ny fampanantenàny ho foana;
tsy namongotra ny taranak’ilay voafidiny Izy,
ary tsy nahalany tamingana an’ilay tia Azy.
Nisy sisa velona navelany teo amin’ny taranak’i Jakôba,
toy izany koa no nanomezany an’i Davida solofo avy aminy.
I Rehabohama sy i Jerobohama23Dia nodimandry i Salômôna ka tafaraka amin’ny razany;
ary ny mpanjaka nanarakaraka azy
dia anankiray tamin’ireo zaza navelany,
dia i Rehabohama izay nampikomy vahoaka
tamin’ny fanapahan-kevitra nataony.
Manam-be izy io ny amin’ny fahadalana
fa mahantra ny amin’ny fahiratan-tsaina.
Tao kosa i Jerobohama, zanakalahin’i Nebata.
Notarihiny hanota ny foko israelita tavaratra
ary lalam-pahotana no natorony
ho an’ny fanjakan’i Efraîma.
24Dia nitombo aoka izany ny fahotan’ireo
ka nentin-ko babo lavitra ny taniny izy;
25haratsiana isan-karazany no nivarinany
ambara-piavin’ny famaizan’Andriamanitra taminy.
Who We AreWhat We EelieveWhat We Do
2025 by iamachristian.org,Inc All rights reserved.
