1Hafatra nataon’ny TOMPO tamin’ny alalan’i Jeremià mpaminany ho an’i Babilôna sy i Babilônia.
2Ambarao amin’ny firenena ny vaovao,
ampahafantaro amin’ny alalan’ny famantarana,
ampahafantaro fa aza afenina
ary lazao hoe: Azo i Babilôna,
henatra moa izao ho an’ny sampiny
ary haketrahana ho an’ireo andriamani-tsiiziny!
Henatra moa izao ny an’i Bela,
ary haketrahana ho an’i Merôdàky.
3Fa misy firenena iray avy any avaratra
miakatra hamely an’i Babilôna,
ka hanova ny taniny ho lao
tsy hisy mponina intsony;
fa na olona na biby fiompy
dia samy lasa nitsoaka avokoa.
4Amin’izany andro sy fotoana izany,
hoy ny teny hentitry ny TOMPO,
dia hiara-tonga ny Israelita sy ny Jodeanina,
ka sady mitomany izy no mandeha
hitady Ahy TOMPO Andriamaniny.
5Hanontany ny lalana mankany Tsiôna ireo,
ka himasoany hizorana izany.
Ho avy izy ka fanekempihavanana mandrakizay
izay tsy hohadinoiny na oviana na oviana
no hifamatorany mafy amiko TOMPO.
6Andian’ondry very ny vahoakako
fa ny mpiandriny no nandiso lalana azy,
ka nampirenireny azy teny an-tendrombohitra.
Nifindrafindra tendrombohitra sy havoana izy
ka nanadino ny vala fandriany.
7Izay fahavalo rehetra nahita azy
dia nandripaka azy avokoa sady nanao hoe:
«Tsy misy mahadiso antsika izao,
satria ireo no meloka eo anatrehan’ny TOMPO
izay fonenam-pamonjena sy fanantenan-drazany.»
8Hoy ny Tompo: «Mandosira lavitra an’i Babilôna,
ilaozy i Babilônia ka manaova hitsin-dalana
toy ny osilahy mialoha ny ondry aman’osy.
9Fa firenena lehibe manao andiany
no hotairiko sy halefako hanafika an’i Babilôna.
Ho tonga avy any avaratra ireny
ka hilahatra hiady aminy sy hahazo azy.
Tsy hivena mihitsy ny zana-tsipîkany
fa ho toy ny miaramila zatra ady
ka tsy hiverim-potsiny.
10Horobaina ny tanin’ny Babilônianina
ary ho afa-po ireo rehetra mandroba azy,
hoy ny teny hentitra avy amiko TOMPO.
11Mahazo mifaly sy miravo ianareo izao,
ry mpamotika ny fananako!
Mahazo mifalihavanja ianareo
toy ny vantotr’ombivavy eny amin’ny ahi-maitso
sy afa-mikiaka toy ny soavaly mpihazakazaka.
12Nefa mba jereo ange ity tanindrazanareo:
tafalatsaka lalina anaty henatra,
tototry ny fahafaham-baràka.
Indro izy nanjary farany amin’ny firenena,
lasa taniefitra sy tany hay ary tanety ngazana.»
13Ny fahaviniran’ny TOMPO no nahatonga an’i Babilôna
tsy honenana intsony fa hampahonena tanteraka.
Ho gaga izay rehetra mandalo azy,
ka hivarahontsana noho ny voina rehetra nanjo azy.
14Ianareo rehetra mpitifitra amin’ny tsipîka,
milahara manodidina an’i Babilôna.
Amelezo azy ny zana-tsipîkanareo
ka aza tsitsîna mihitsy
satria meloka eo anatrehan’ny TOMPO izy.
15Manaova akoran’ady manodidina
mba hampikoizana azy.
Indro fa nitolo-batana izy!
Rava ny tilikambom-piarovany
ary nianjera ny mandany.
Izany no famalian’ny TOMPO!
Koa valionareo i Babilôna;
araka ny nataony tamin’ny hafa
no mba ataovinareo aminy koa.
16Foany ao Babilôna ireo mpamafiny
sy ireo mpijinjany amin’ny fararano;
manoloana ny ady mahatsiravina,
dia aoka samy hody any amin’ny fireneny avy izy
ary samy handositra any amin’ny taniny avy!
17I Israely dia toy ny ondry very
izay nenjehin’ny liona.
Ny mpanjakan’i Asiria no voalohany nihinana taminy; avy eo dia tonga i Nebokadnetsara mpanjakan’i Babilôna nanapatapaka ny taolany.
18Noho izany, dia izao no lazain’ny TOMPOn’izao rehetra izao sady Andriamanitr’i Israely: «Hirotsaka an-tsehatra hamely ny mpanjakan’i Babilôna sy ny taniny Aho, tahaka izay nirotsahako an-tsehatra namely ny mpanjakan’i Asiria fahiny.
19Fa i Israely kosa haveriko
amin’ny kijana fiandrasana azy,
ka hirao-bilona any Karmela sy any Basàna;
ary eo an-tendrombohitr’i Efraîma sy ao Gilehada
no hahafa-po sy hahavoky azy.
20Izaho TOMPO dia manao teny hentitra hoe:
Amin’izany andro izany, na dia hotadiavina aza
ny fahadisoan’i Israely sy ny helok’i Joda,
dia hanjavona tsy ho hita intsony;
satria havelako heloka
ireo sisa notsimbiniko ho velona.
21Tafiho ny tanin’i Merataîma!
Tafiho izy sy ny mponina ao Pekôda.
Vonoy ho faty ireo ka aringano
hatramin’ny olona farany,
hoy ny teny hentitra avy amiko TOMPO.
Tanteraho izay rehetra voadidiko!
22Tabataban’ady no tao amin’io tany io,
ary fandringanana goavana!
23Andray! Potika sy torotoro i Babilôna,
ilay tantanam-pamontsanana ny tany tontolo.
Andray! Tonga taniefitra mahonena izy
eo anivon’ny firenena maro.
24Namelarako fandrika ianao, ry Babilôna,
ka voan’izany, nefa tsy fantatrao akory.
Tratra sy voasambotra ianao,
satria Izaho TOMPO no niadianao.»
25Novohan’ny TOMPO ny trano fitehirizany,
ka nalainy tao ireo fiadiana
izay anehoany ny fahavinirany.
Ao amin’ny tanin’i Babilôna
dia izany no asan’ny Tompo,
ilay ANDRIAMANITR’izao rehetra izao.
26Hatrany am-paran’ny tany, avia avokoa
ianareo rehetra hamely azy.
Sokafy ny fitehirizam-bokany
ka avangongoy ho antonta iray ny remby;
fa aringano tanteraka ny tanàna:
aoka tsy hisy tavela intsony!
27Vonoy ho faty ny miaramilany rehetra;
aoka hidina any an-toeram-pamonoana ireo!
Idiran-doza ireo fa tonga ny androny
dia ny fotoana hamalian’ny Tompo azy.
28Injany ireo mpandositra
afa-nitsoaka avy any Babilônia
mitondra ny vaovao ao Tsiôna:
namaly faty an’i Babilôna
ny TOMPO Andriamanitsika,
namaly faty azy noho ny tempoliny masina Izy.
29Antsoy ny mpandefa zana-tsipîka,
dia ireo rehetra mpanenjana tsipîka,
ka vorio hamely an’i Babilôna.
Aoka ireo hitoby manodidina azy
ka tsy hamela ny mponiny ho afa-miala.
Aoka hovaliana araka ny ratsy nataony izy
ka izay rehetra nataony tamin’ny hafa
no mba ampiharo aminy kosa!
Satria izy niavonavona tamin’ny TOMPO,
dia tamin’ilay Masin’i Israely.
30«Noho izany dia ho faty eny an-kianja eny ireo zatovony, ary ho ringana ireo miaramilany rehetra amin’izany andro izany, hoy ny teny hentitry ny TOMPO.
31Indro Aho hifanandrina aminao
ry Babilôna mpiavonavona,
Izaho Tompo ANDRIAMANITR’izao rehetra izao
no manao izany teny hentitra izany.
Fa tonga ny andronao izao,
dia ny fotoana hamaliako anao.
32Mivembena ary mianjera ilay mpiavonavona,
fa tsy misy manarina azy.
Andrehetako afo amin’ireo tanànany
ka handevona izay rehetra manodidina azy izany.»
33Izao no lazain’ny TOMPOn’izao rehetra izao:
«Samy nampahorìna ny Israelita sy ny Jodeanina;
ary izay rehetra namabo azy
dia mitana azy an-keriny,
fa tsy manaiky handefa azy.
34Nefa Izaho mpanavotra azy dia mahery:
TOMPOn’izao rehetra izao no anarako.
Horaisiko an-tanana tokoa ny adiny
mba hampiadana ny taniny
sy hampikorontana kosa ny mponin’i Babilôna.»
Ny tetika hamelezan’ny Tompo an’i Babilôna35Hoy ny teny hentitry ny TOMPO:
«Hisy ady hamely ny Babilônianina,
mbamin’ny mponina ao an-drenivohitra
sy ny mpitondrany ary ny olon-kendriny!
36Hisy ady hamely ny mpimasiny,
ka ho very saina ireo!
Hisy ady hamely ny maherifony,
ka ho ketraka izy!
37Hisy ady hamely ny soavaliny sy ny kalesiny
mbamin’ny olona rehetra samy hafa firenena ao aminy,
ka halemy toy ny vehivavy izy!
Hisy ady hamely ny haren-tsarobidiny,
ka ho voaroba ireo!
38Hisy ady hamely ny reniranony,
ka ho ritra ireo!
Satria tany be sarivongan-tsampy io,
dia sary mahatsiravina
sady mahatonga izay manompo azy hirediredy.
39Noho izany dia ny kary sy ny amboadia
no honina ao Babilôna;
ary ny vorombe koa no hipetraka ao.
Fa tsy honenana intsony izy mandrakizay
ary tsy hitoerana hatramin’ny taranaka mifandimby.
40Tahaka ny nandravako an’i Sôdôma sy i Gômôra,
mbamin’ireo tanàna teny akaikiny,
no hataoko amin’i Babilôna,
hoy ny teny hentitra avy amiko TOMPO,
ka tsy hisy olona honina
na hivahiny any intsony.
41Indro misy vahoaka tonga avy any avaratra
dia firenen-dehibe iray;
ary mpanjaka mahery no miainga
avy any am-paran’ny tany.
42Mampirangaranga tsipîka sy lefona
ireo miaramilany lozabe sady tsy mamindra fo.
Mirohondrohona toy ny ranomasina ny feony.
Mitaingin-tsoavaly izy,
ary milahatra toy ny andian-tafika hiady
mba hamely anao, ry Babilôna!
43Ren’ny mpanjakan’i Babilôna
izany vaovao izany,
ka miraviravy tanana izy
sady tratry ny fanaintainana
toy ny vehivavy raha miteraka.
44Hoy ny Tompo: «Indro Aho ho toy ny liona
miakatra avy ao an-kirihitralan’i Jôrdàna
sy mirifatra mankany amin’ny fonenany
ka ao anatin’ny indray mipi-maso
no hampandosirako ny Babilônianina.
Ary hapetrako ao Babilôna
ilay nofidiko ho lehibeny.
Koa iza no azo ampitahaina amiko?
Iza no sahy hifandahatra amiko?
Ary iza no mpitondra hahatohitra Ahy?»
45Noho izany, henoy àry ny tetika
novolavolain’ny TOMPO
hamelezana an’i Babilôna
sy ny paika nomaniny
hamelezana ny mponin’i Babilônia.
Ho toy ny fitondra biby fiompy mihitsy
no hitondrana azy any an-kafa
hatramin’ny olona farany indrindra!
Ny fonenany mihitsy aza no manilika azy.
46Mihorohoro ny tany mandre
ny vaovao hoe: «Azo i Babilôna»
Ary horakoraka no manako
any amin’ireo firenena.
Who We AreWhat We EelieveWhat We Do
2025 by iamachristian.org,Inc All rights reserved.
