1 Salamo nataon’i Davida.
Ianareo anjely, tolory haja ny TOMPO,
eny, tolory haja IZY fa be voninahitra sy hery;
2Atolory AZY ny voninahitry ny anarany,
ka dia miankohofa eo anatrehan’ny TOMPO
rehefa miseho ny fahamasinany.
3Andriamanitra be voninahitra
no mampikotrokotroka ny orana;
mitrena eny ambony rano ny feon’ny TOMPO:
ny TOMPO no manapaka eny ambony ranobe.
4Midoboka mafy ny feon’ny TOMPO,
satria heni-pahefana sy be fiandrianana IZY.
5Mandripaka hazo sedera ny feon’ny TOMPO:
eny, ripaky ny TOMPO ireo sederan’i Libano.
6Ampitroariny toa zanak’omby
ny tendrombohitr’i Libano;
ampitroariny toa vantotr’ombimanga
ny tendrombohitr’i Hermôna.
7Mampitselaka ny tselatra ny feon’ny TOMPO.
8Mampihovotra ny taniefitra ny feon’ny TOMPO;
eny, ny TOMPO no mampihovotra ny taniefitr’i Kedesa.
9Mampangovitra ny ôaka ny feon’ny TOMPO
ary mampihintsan-dravina ny ala be.
Ny ao an-dapan’ny Tompo samy manao hoe:
«Voninahitra anie ho an’Andriamanitra!»
10Ny TOMPO no mitoetra ho mpifehy
na dia ny rano tsy hita faritra aza;
mitoetra ho mpanjaka mandrakizay IZY.
11Homen’ny TOMPO hery anie ny vahoakany
ka dia hotahîny hombam-piadanana!
Who We AreWhat We EelieveWhat We Do
2025 by iamachristian.org,Inc All rights reserved.
