Fahendrena 9 - Malagasy Bible Interconfessionelle

1«Ry Andriamanitry ny razako

sady Tompo loharanon’ny famindrampo ô,

ny teninao no nanaovanao izao rehetra izao,

2ny Fahendrenao no namboaranao ny olombelona

ho Tompon’ny zavaboaarinao rehetra

3ka hifehy an’izao tontolo izao

am-pahamasinana sy am-pahamarinana

ary hitsara amim-pahitsiana.

4Mba omeo ahy ny fahendrena

izay miray sezafiandrianana aminao,

ary aza esorina tsy ho isan’ny zanakao aho.

5Mpanomponao manko aho

ary zanaky ny mpanompovavinao,

olona osa sy fohy andro iainana,

tsy ampy fahatakarana ny didy aman-dalàna.

6Fa na misy aza olombelona tanteraka,

kanefa tsy manana ny fahendrena avy aminao,

dia naman’ny tsinontsinona ihany.

7Ianao no nifidy ahy

ho mpanjakan’ny vahoakanao,

ho mpitsaran’ny zanakao lahy sy vavy.

8Ianao no nandidy ahy hanorina

tempoly eo an-tendrombohitrao masina

sy alitara ao an-tanàna fonenanao

araka ny môdelin’ny tranolay masina

izay nomaninao hatramin’ny voalohany.

9Eo anilanao ny Fahendrena

ka mahalala ny asanao;

efa teo izy fony nanao izao tontolo izao Ianao.

Fantany izay sitraka eo imasonao

sy izay mahitsy araka ny didinao.

10Ampidino avy any an-danitra masina izy;

avy any amin’ny seza fiandriananao be voninahitra

no aniraho azy hiasa eo anilako

ka hahafantarako izay sitrakao.

11Mahay ary mahafantatra ny zava-drehetra izy,

ka hitari-dalana ahy amin’ny asako

araka ny fahamalinana

ary hiaro ahy noho ny voninahiny.

12Koa ho sitrakao ny asako,

dia hitsara ara-drariny ny vahoakanao aho

ary ho mendrika ny seza fiandrianan-draiko.»

Ilain’ny olombelona tokoa ny Fahendrena

13«Iza no olombelona afaka hahalala

ny sitraponao, Andriamanitra ô?

Iza no hahatakatra ny fikasanao, Tompo ô?

14Raha izahay olombelona mety maty manko

dia mihambahamba ny hevitray,

tsy azo ianteherana ny eritreritray;

15satria ny fanahinay vesaran’ny vatanay mety lo,

ary ny sainay be herehina dia vizan’ity fonony eto an-tany ity

16Efa manahirana anay ny maminavina

ny zava-misy eto an-tany,

ary mananosarotra anay ny mahita

ny zavatra antomotra ny tananay;

koa iza àry no hahatakatra

izay zava-misy any an-danitra?

17Ary ny sitraponao, Tompo ô,

iza no mba nahalala izany,

raha tsy nomenao ny Fahendrena

sy nanirahanao ny Fanahinao Masina

avy any ambony any?

18Izany no nahavoahitsy lalana

ny mponina teto ambonin’ny tany,

ka nahalalan’ny olona ny sitrakao

sy namonjen’ny Fahendrena azy.»

Ny anjara asan’ny Fahendrena eo amin’ny tantara