Bena-Siràka 45 - Malagasy Bible Interconfessionelle

1izay nahazo sitraka tamin’ny besinimaro

fa notiavin’Andriamanitra sy ny olombelona.

Hisaorana an’Andriamanitra anie ny fahatsiarovana azy!

2Notoloran’ny Tompo voninahitra

sahala amin’ny voninahitry ny anjely izy,

ary koa nataony nanan-daza

satria nampatahotra ny fahavalo.

3Ny tenin’ny Tompo no nahatontosa faingana ireo famantarana

ka nanomezany voninahitra an’i Mosesy teo imason’ny mpanjaka.

Natolony azy koa ny didy ho an’ny vahoakany

ary nasehony azy ny ampahan’ny voninahiny.

4Ny toetra mahatoky sy halemem-panahy nananan’i Mosesy

no nanokanan’ny Tompo azy sy nifidianany azy

hiavaka anivon’ny olombelona rehetra.

5I Mosesy dia nampandrenesin’ny Tompo ny feony

sy nampidiriny tao anatin’ny rahona matevina;

nifanatrika taminy izy no notolorany ny didiny,

dia ny lalàna manome fiainana sy fahalalana:

izany no nampianarany ny fanekempihavanany sy ny fitsipiny

tamin’ireo taranak’i Jakôba, dia ny vahoaka israelita.

I Aharôna(Jereo Eks 4.14-15; 28.1-43; 39; Lev 8; 7)

6Nasandratry ny Tompo koa i Aharôna

izay lehilahy voatokana tahaka an’i Mosesy

sady rahalahiny avy amin’ny fokon’i Levỳ.

7Najorony araka ny fandaminana maharitra hatrany izy

ary nomeny ny fisoronana teo amin’ny vahoakany;

nataony finaritra tamin’ny fanamiana tsara tarehy izy,

nampiakanjoiny akanjo rebareba mamirapiratra,

8nampitafîny haingo marevaka

ary nametrahany ny satroboninahitra

sy ireo mariky ny fahefana ananany:

dia ny kalisaonina sy ny akanjo lava ary ny efôda.

9Manodidina ny moron-tongotr’ilay akanjo rebareba

dia nasiany sahondra miendrika ampongabendanitra

sy lakolosy madinika volamena betsaka tokoa.

mba hikorintsana rehefa mamindra i Aharôna;

namoaka feo nanako tao an-tempoly ireo

mba ho fampahatsiarovana an’Andriamanitra

ny amin’ireo olona anisan’ny vahoakany.

10Io akanjo masina rebareba fitondran’i Aharôna io

dia voatenona kofehy volamena sy volomparasy ary mena,

asan’ny mpanao amboradara izany.

Teo ambonin’izany kosa ny akanjo saron-tratra

izay fanaovana fitsarana sady fanambarana ny marina:

11io akanjo saron-tratra io dia voatenona kofehy jaky,

asan’ny mpahay taozavatra izany;

voahaingo vatosoa nosokirina toy ny tombokase ilay izy

sady ao amin’ny tranony volamena misy anarana voasoratra

araka ny isan’ireo fokon’ny vahoaka Israely

mba ho fampahatsiarovana an’Andriamanitra ny aminy:

asan’ny mpahay vatosoa izany.

12Nasiana firavaka volamena teo amin’ny fehilohan’i Aharôna,

dia firavaka mirakitra teny voasokitra hoe:

«Voatokana ho an’ny Tompo!»

Mari-boninahitra izany, taozavatra voakaly tokoa,

hafinaretan’ny maso mijery satria tena tsara voatra.

13Tsy nisy fitafiana fatratra toy izany, talohan’i Aharôna;

tsy nisy olon-kafa nisalotra izany

afa-tsy ny zanany lahy ihany

mbamin’ny lehilahy taranany hatrany hatrany.

14Ny sorona fanolotr’i Aharôna,

indroa isan’andro tsy tapaka,

dia tokony hodorana manontolo.

15I Mosesy no nanao ny fanokanana an’i Aharôna

ka nandraraka menaka masina teo an-dohany:

Fandaharana maharitra izany

ho an’i Aharôna sy ny taranany,

raha mbola misy koa ny habakabaka.

Hanao ny fanompoam-pivavahana amin’ny Tompo

sy hanefa ny raharaha fisoronana izy ireo

ary koa hitsodrano ny vahoakany

amin’ny anaran’Andriamanitra.

16Nofidîn’ny Tompo tamin’ny olombelona rehetra i Aharôna

mba hanolotra ho Azy ny fanatitra eo amin’ny alitara,

dia ny emboka sy ny vovo-javamanitra

hahatsiahivan’ny Tompo an’ireo olony

ary mba hanao ny fombam-pivavahana famelan-keloka

ho fitsimbinana ny vahoakan’Andriamanitra.

17Ao amin’ny didiny dia nomen’ny Tompo an’i Aharôna

ny fahefana hitsara araka ny voatondron’ny lalàna

sy hampianatra ireo taranak’i Jakôba ny baikony

ary hanazava ny vahoaka Israely amin’ny lalànany.

18Nisy olon-kafa nialona azy tany an-taniefitra

ka nioko hanohitra azy tamin-katezerana sy havinirana,

dia i Datàna sy i Abirama miaraka amin’ny olony

ary i Kôra miaraka amin’ny antokony.

19Hitan’ny Tompo izany ka tsy sitrany velively,

dia nirehitra ny hatezerany handringana an’ireo;

nanao zava-mahagaga Izy hamelezana ny mpikomy,

dia ny fandevonana azy tamin’ny afo miredareda.

20Mbola nampian’ny Tompo indray ny voninahitr’i Aharôna

ka nomeny anjara fananana izy,

dia ny santa-bokatra atao fanatitra;

ary voalohany indrindra dia ny mofo

no nataony voaomana betsaka hamokisana azy.

21Ny zavatra natao sorona ho an’ny Tompo

no sakafo niveloman’ireo mpisorona,

ka nomeny an’i Aharôna sy ny taranany.

22Tsy mba nisy zaratany nananany kosa

teo amin’ny tanin’ny mpiray firenena aminy;

tsy nisy anjara ho azy teo anivon’ny vahoaka israelita,

satria hoy ny Tompo tamin’i Aharôna:

«Izaho no anjaranao sy fanananao.»

I Pinehasa(45.23-25; jereo Nom 25.6-13; 1 Mak 2.54)

23I Pinehasa, zanakalahin’i Elehazara,

no fahatelo amin’ny voninahitra

satria nazoto nanaja ny Tompo izy;

rehefa nikomy tamin’Andriamanitra ny vahoaka,

dia nijoro tamin-kerimpo fatratra izy

ka nahazo famelana ho an’i Israely.

24Izany no nanaovan’ny Tompo fanekempihavanana taminy

ka nahatonga azy ho lehiben’ny Toeramasina

sy ho solotenan’ny vahoakany eo anatrehany;

dia lasan’i Pinehasa sy ny lehilahy taranany

ny andraikitra maha mpisorombe hatrany hatrany.

25Nisy fanekempihavanana koa

nataon’ny Tompo tamin’i Davida,

zanakalahin’i Jisay anisan’ny fokon’i Joda;

nampanantenana izy fa ny fandovana fahefana hanjaka

dia hifindra amin’ny taranany lahy anankiray hatrany;

fa ny fandovana ny fisoronan’i Aharôna kosa

dia natao ho an’ny lehilahy rehetra taranany.

26Ianareo mpisorombe, enga anie ny fahendrena

no hapetraky ny Tompo ao am-ponareo

mba hitsaranareo ny vahoakany ara-drariny,

ka tsy ho foana ny fanambinana anareo

sy ny voninahitrareo amin’ny taranaka mifandimby!