1Endrey ny habakabaka, erỳ ambony,
fa madio mangatsakatsaka tokoa;
endrey ny endriky ny lanitra,
rehefa tazana mamirapiratra!
2Ny masoandro miseho amin’ny fiposahany
dia manambara fa tena zava-mahagaga
ny asa ataon’ilay Avo Indrindra.
3Ny masoandro, rehefa mitataovovonana,
dia mahakarankaina ny tany;
ka iza no hahatanty ny hafanàny?
4Arehitra hivaivay ny afon’ny lafaoro
ho an’ny asa mitaky hafanàna;
fa intelo henin’izany ny hafanàn’ny masoandro
izay mampidonaka ny tendrombohitra.
Mifofofofo mamoaka eton’afo ny masoandro
ary mandefa tara-pahazavana
izay mampanjambena ny maso.
5Lehibe ny Tompo Izay nanao ny masoandro;
ary araka ny didiny no anohizany
ny fihazakazahana tontosainy.
Ny volana(Jereo Gen 1.14; 8.22; Sal 104.19)6Ny volana koa dia manaraka lalandava
ny ora voatendry hiposahany
ho fanondroana ny fotoanandro
ary ho famantarana ny faharetany.
7Ny volana no famantarana ny andro fety,
fony izy mihena hazavana, aorian’ny fenomanana.
8Avy aminy no mahazo anarana
ny volana fitsinjaran-taona;
ary mampitolagaga ny fitombony
ao anatin’ny fiovaovàny samy hafa.
Izy no fanala manilo ny kintana
izay tafika mitoby eny ambony eny;
izy no fanala mamirapiratra
eo amin’ny habakabaky ny lanitra.
Ny kintana sy ny planeta(Jereo Is 40.26; Jôb 25.2-3; Bar 3.34-35)9Ny kintana sy ny planeta manjopiaka
no mampisy endrika ny habakabaka:
izany no ravaka mamirapiratra
eny amin’ny toerana ambony dia ambony eny.
10Araka ny didin’ilay Masina
no aharetany eo amin’ny sehatra
izay voatendry hisy azy avy;
ary tsy mba misy mihalangalana ireny
eo amin’ny fiambenana sahaniny.
Ny zava-mahatalanjona eo amin’ny voaary(43.11-12; jereo Gen 9.12-17; Ezek 1.28; Ben-Sir 43.13-33; jereo Jôb 36.27–37.24; 38.22-38)11Jereo ny avana, ka isaory Ilay nanao azy;
fa tsara tarehy fatratra ny avana
amin’ny fahazavàny mangarangarana.
12Faribolana mamiratra no soritany
eny amin’ny habakabaka eny;
ny tanan’ilay Avo Indrindra mihitsy
no efa nanenjana azy toy izany.
13Noho ny baiko ataon’ny Tompo ihany
no irotsahan’ny vongan-dranomandry
sy mahadodom-piavy ny hela-baratra
izay mpanatanteraka ny fitsarany.
14Izany no isokafan’ny firaketany
ka ivoahan’ny rahona miala tao
sy anidinkidinany toy ny vorona.
15Ny fahefàn’Andriamanitra no mampivongana ny rahona
ary mampisilasilaka azy hanjary havandra vaventy.
17aMampihorohoro ny tany ny fidoboky ny kotrokorany;
16ary rehefa miseho Izy, dia mihozona ny tendrombohitra.
Araka ny sitrapony no itsofan’ny rivotra avy any atsimo
17bna ny tafioka avy any avaratra sy ny tadio
mitambolina.
Andriamanitra no mandrotsaka ny oram-panala
toy ny vorona midaboka amin’ny tany;
ary toy ny andiam-balala hipetraka
no filatsahan’izany oram-panala izany.
18Fotsy mangatsakatsaka izy ka mampitolagaga ny maso,
ary mivatravatra fiavy ka tena mahavariana ny fo.
19Afafin’Andriamanitra koa ny fanala
ho tahaka ny sira miely amin’ny tany;
dia hamafisin’ny hatsiaka ireny
ho tahaka ny tendron-tsilo maranidranitra.
20Rehefa injay manomboka mifofofofo kosa
ny rivotra mangatsiaka avy any avaratra,
dia misy ranomandry mivaingana
eny ambonin’ny velaran-drano;
ny ranovory isan-karazany
no iantefan’izany rivotra izany,
ka mova tsy akanjo vy fiarovan-tena
no fitafiana andrakofany azy.
21Mandoro ny tendrombohitra kosa ny rivo-mafana
ary mandazolazo ny eny an-tsaha eny,
ka toy ny afo mandevona ny zava-maitso.
22Kanefa ireny zavatra simba ireny
dia ny rahona vonton-drano no fanafodiny;
ary ny ando tonga no mitondra fiononana
aorian’ny hafanàna migaingaina.
23Araka ny fandaharan’Andriamanitra
dia nampitoniany ny ranomasimbe
ka nisy nosy novoleny teo anivony.
24Tantarain’ireo mandeha an-tsambo
eny ambonin’ny ranomasina eny
ny loza mety mitranga ao aminy,
ka talanjona dia talanjona isika
mandre ny famisavisàny azy,
25sady ao koa no misy ny zava-boaary
hafahafa endrika sy mampitolagaga,
dia ny karazan-java-mananaina maro
sy ny trozona rehetra anaty ranomasina.
26Tantanan’Andriamanitra ny zava-drehetra
hizotra tsara mankany amin’izay hiafarany;
noho ny teniny no aharetany miara-mirindra.
27Afaka milaza betsaka toy izany izahay,
nefa tsy hahatapitra ny tokony hambara;
ka dia izao no farateny ataonay:
Andriamanitra no fototry ny zavatra rehetra.
28Tsy manan-kery velively izahay
hanomezam-boninahitra Azy,
satria Izy no Ilay Andriamanitra Lehibe,
ambony noho ny asany rehetra.
29Mahatahotra ny Tompo sady lehibe tsisy fetra;
ary mampitolagaga tokoa ny fahefàny.
30Raha manome voninahitra ny Tompo ianareo,
dia manandrata Azy araka izay azonareo atao,
kanefa mbola ho tafahoatra noho izany ihany Izy;
ary raha manandratra Azy ianareo,
dia mahereza hatrany ka aza mitsahatra
satria tsy hahatapitra ny tokony hambara.
31Iza moa no efa nahita an’Andriamanitra
ka afaka hanambara ny momba Azy?
Iza no mahay mankalaza Azy
araka izay tena tokony ho sahaza Azy?
32Vitsivitsy amin’ny asany ihany no hitantsika,
fa mbola betsaka ny zava-miafina amintsika
ary lehibe kokoa noho ireo voatanisa ireo aza.
33Eny, ny Tompo no nanao ny zavatra rehetra;
ary ny olona tia vavaka no efa nomeny fahendrena.
Who We AreWhat We EelieveWhat We Do
2025 by iamachristian.org,Inc All rights reserved.
