Jeremià 45 - Malagasy Bible Interconfessionelle

Hafatra ho an’i Baròka

1Fony i Baròka zanakalahin’i Nerià nanao an-tsoratra ny hafatra izay notononin’i Jeremià, dia taona fahefatra nanjakàn’i Jôiakima zanakalahin’i Jôsià sady mpanjakan’i Joda tamin’izay; ka hoy ny teny nataon’i Jeremià mpaminany tamin’i Baròka:

2–Izao no lazain’ny TOMPO Andriamanitr’i Israely momba anao, ry Baròka.

3«Idiran-doza aho, hoy ianao, fa ampian’ny TOMPO alahelo indray ny fahoriako; efa sasatry ny misento aho fa tsy mba misy hitsaharana!»

4Noho izany, dia izao no hafatry ny TOMPO asainy ampitaiko aminao:

«Eo am-pandravana izay naoriko Aho izao

ary eo am-panongotana izay namboleko;

ary korontaniko ny tany tontolo.

5Koa ianao ve sahy hitaky tombontsoa

ho an’ny tenanao manokana?

Tsia, aza mitaky na inona na inona;

fa indro Aho hahatonga loza

ho amin’ny olombelona rehetra.

Teny hentitra avy amiko TOMPO izany.

Kanefa izao no tombontsoa hanananao:

Hataoko velona aina ianao

any amin’ny toerana rehetra halehanao.»