MIYAMBO 12 - Buku Lopatulika ndilo Mau a Mulungu

1Wokonda mwambo akonda kudziwa;

koma wakuda chidzudzulo apulukira.

2Yehova akomera mtima munthu wabwino;

koma munthu wa ziwembu amtsutsa.

3Munthu sadzakhazikika ndi udyo,

muzu wa olungama sudzasunthidwa.

4 1Ako. 11.7 Mkazi wodekha ndiye korona wa mwamuna wake;

koma wochititsa manyazi akunga chovunditsa mafupa a mwamunayo.

5Maganizo a olungama ndi chiweruzo;

koma uphungu wa oipa unyenga.

6Mau a oipa abisalira mwazi;

koma m'kamwa mwa olungama muwalanditsa.

7 Mat. 7.24-27 Oipa amagwa kuli zii;

koma banja la olungama limaimabe.

8 1Sam. 25.17 Munthu amatamandidwa monga mwa nzeru yake;

koma wokhota mtima adzanyozedwa.

9Wonyozedwa, amene ali ndi kapolo,

aposa wodzikuza, amene asowa zakudya.

10 Deut. 25.4 Wolungama asamalira moyo wa choweta chake;

koma chifundo cha oipa ndi nkhanza.

11 Gen. 3.19 Zakudya zikwanira wolima minda yake;

koma wotsata anthu opanda pake asowa nzeru.

12Woipa akhumba chokodwa ndi amphulupulu;

koma muzu wa olungama umabala zipatso.

13M'kulakwa kwa milomo muli msampha woipa;

koma wolungama amatuluka m'mavuto.

14 Yes. 3.10-11 Munthu amakhuta zabwino ndi zipatso za m'kamwa mwake;

zochita za manja ake zidzabwezedwa kwa iye.

15 Luk. 18.11 Njira ya chitsiru njolungama pamaso pakepake;

koma wanzeru amamvera uphungu.

16Mkwiyo wa chitsiru udziwika posachedwa;

koma wanzeru amabisa manyazi.

17Wolankhula ntheradi aonetsa chilungamo;

koma mboni yonama imanyenga.

18 Mas. 59.7 Alipo wonena mwansontho ngati kupyoza kwa lupanga;

koma lilime la anzeru lilamitsa.

19 Mas. 52.4-5 Mlomo wa ntheradi ukhazikika nthawi zonse;

koma lilime lonama likhala kamphindi.

20Chinyengo chili m'mitima ya oganizira zoipa;

koma aphungu a mtendere amakondwa.

21Palibe vuto lidzagwera wolungama;

koma amphulupulu adzadzazidwa ndi zoipa.

22 Chiv. 22.15 Milomo yonama inyansa Yehova;

koma ochita ntheradi amsekeretsa.

23Munthu wanzeru abisa zomwe adziwa;

koma mtima wa opusa ulalikira utsiru.

24Dzanja la akhama lidzalamulira;

koma waulesi adzakhala ngati kapolo.

25 Yes. 50.4 Nkhawa iweramitsa mtima wa munthu;

koma mau abwino aukondweretsa.

26Wolungama atsogolera mnzake;

koma njira ya oipa iwasokeretsa.

27Waulesi samaotcha nyama yake anaigwira;

koma wolungama amalandira chuma chopambana cha anthu.

28M'khwalala la chilungamo muli moyo;

m'njira ya mayendedwe ake mulibe imfa.