MIYAMBO 4 - Buku Lopatulika ndilo Mau a Mulungu

Chenjezo lakuti afune Nzeru nalewe njira za oipa

1Ananu, mverani mwambo wa atate,

nimutchere makutu mukadziwe luntha;

2pakuti ndikuphunzitsani zabwino;

musasiye chilangizo changa.

3 1Mbi. 29.1 Pakuti ndinali mwana kwa atate wanga,

wokondedwa ndi mai, ndine ndekha, sanabale wina.

4Atate nandiphunzitsa, nati kwa ine,

mtima wako uumirire mau anga;

sunga malamulo anga, nukhale ndi moyo.

5Tenga nzeru, tenga luntha;

usaiwale, usapatuke pa mau a m'kamwa mwanga;

6usasiye nzeru, ndipo idzakusunga;

uikonde, idzakutchinjiriza.

7Nzeru ipambana, tatenga nzeru;

m'kutenga kwako konseko utenge luntha.

8Uilemekeze, ndipo idzakukweza;

idzakutengera ulemu pamene uifungatira.

9Idzaika chisada cha chisomo pamutu pako;

idzakupatsa korona wokongola.

10Tamvera mwananga, nulandire mau anga;

ndipo zaka za moyo wako zidzachuluka.

11Ndakuphunzitsa m'njira ya nzeru,

ndakuyendetsa m'mayendedwe olungama.

12Mapazi ako sadzaombana ulikuyenda;

ukathamanga, sudzaphunthwa.

13Gwira mwambo, osauleka;

uusunge; pakuti ndiwo moyo wako.

14 Mas. 1.1 Usalowe m'mayendedwe ochimwa,

usayende m'njira ya oipa.

15Pewapo, osapitamo;

patukapo, nupitirire.

16 Yes. 57.20 Pakuti akapanda kuchita zoipa, samagona;

ndipo akapanda kukhumudwitsa wina, tulo tao tiwachokera.

17Pakuti amadya chakudya cha uchimo,

namwa vinyo wa chifwamba.

18 2Sam. 23.2, 4; Mat. 5.14-16 Koma mayendedwe a olungama akunga kuunika kwa mbandakucha,

kunkabe kuwala kufikira usana woti mbee.

19 1Sam. 2.9 Njira ya oipa ikunga mdima;

sadziwa chimene chiwaphunthwitsa.

20Mwananga, tamvera mau anga;

tcherera makutu ku zonena zanga.

21Asachoke kumaso ako;

uwasunge m'kati mwa mtima wako.

22 Deut. 32.46-47 Pakuti ali moyo kwa omwe awapeza,

nalamitsa thupi lao lonse.

23Chinjiriza mtima wako koposa zonse uzisunga;

pakuti magwero a moyo atulukamo.

24Tasiya m'kamwa mokhota,

uike patali milomo yopotoka.

25Maso ako ayang'ane m'tsogolo,

zikope zako zipenye moongoka.

26Sinkhasinkha bwino mayendedwe a mapazi ako;

njira zako zonse zikonzeke.

27 Yos. 1.7 Usapatuke kudzanja lamanja kapena kulamanzere;

suntha phazi lako kusiya zoipa.