MIYAMBO 3 - Buku Lopatulika ndilo Mau a Mulungu

Malangizo a kuopa, kukhulupirira, ndi kumvera Yehova

1 Deut. 8.1 Mwananga, usaiwale malamulo anga,

mtima wako usunge malangizo anga;

2pakuti adzakuonjezera masiku ambiri,

ndi zaka za moyo ndi mtendere.

3 Deut. 6.8; 2Ako. 3.3 Chifundo ndi choonadi zisakusiye;

uzimange pakhosi pako;

uzilembe pamtima pako;

4 Aro. 14.18 motero udzapeza chisomo ndi nzeru yabwino,

pamaso pa Mulungu ndi anthu.

5 Yer. 9.23 Khulupirira Yehova ndi mtima wako wonse,

osachirikizika pa luntha lako;

6 1Mbi. 28.9 umlemekeze m'njira zako zonse,

ndipo Iye adzaongola mayendedwe ako.

7Usadziyese wekha wanzeru;

opa Yehova, nupatuke pazoipa;

8mitsempha yako idzalandirapo moyo,

ndi mafupa ako uwisi.

9 Eks. 22.29 Lemekeza Yehova ndi chuma chako,

ndi zinthu zako zonse zoyambirira kucha;

10motero nkhokwe zako zidzangoti thee,

mbiya zako zidzasefuka vinyo.

11 Aheb. 12.5-6 Mwananga, usapeputse mwambo wa Yehova,

ngakhale kutopa ndi kudzudzula kwake;

12pakuti Yehova adzudzula omwe awakonda;

monga atate mwana amene akondwera naye.

Phindu la Nzeru

13Wodala ndi wopeza nzeru,

ndi woona luntha;

14 Yob. 28.12-19 pakuti malonda a nzeru aposa malonda a siliva,

phindu lake liposa golide woyengeka.

15 Mat. 13.44 Mtengo wake uposa ngale;

ndipo zonse zikukondweretsa sizilingana naye.

16Masiku ambiri ali m'dzanja lamanja lake;

chuma ndi ulemu m'dzanja lake lamanzere.

17Njira zake zili zokondweretsa,

mayendedwe ake onse ndiwo mtendere.

18 Gen. 2.9; 3.22 Ndiyo mtengo wa moyo wa akuigwira;

wakuiumirira ngwodala.

19Yehova anakhazika dziko ndi nzeru;

naika zamwamba ndi luntha.

20Zakuya zinang'ambika ndi kudziwa kwake;

thambo ligwetsa mame.

21Mwananga, zisachokere kumaso ako;

sunga nzeru yeniyeni ndi kulingalira;

22ndipo mtima wako udzatengapo moyo,

ndi khosi lako chisomo.

23 Mas. 91.11-12 Pompo udzayenda m'njira yako osaopa,

osaphunthwa phazi lako.

24 Lev. 26.6 Ukagona, sudzachita mantha;

udzagona tulo tokondweretsa.

25 Mas. 91.5 Usaope zoopsa zodzidzimutsa,

ngakhale zikadza zopasula oipa;

26pakuti Yehova adzalimbitsa mtima wako,

nadzasunga phazi lako lingakodwe.

Malangizo ena osiyana

27 Aro. 13.7; Agal. 6.10 Oyenera kulandira zabwino usawamane;

pokhoza dzanja lako kuwachitira zabwino.

28 Lev. 19.13 Usanene kwa mnzako, Ukabwerenso,

ndipo mawa ndidzakupatsa;

pokhala uli nako kanthu.

29Usapangire mnzako chiwembu;

popeza akhala nawe pafupi osatekeseka.

30 Aro. 12.18 Usakangane ndi munthu chabe,

ngati sanakuchitire choipa.

31Usachitire nsanje munthu wachiwawa;

usasankhe njira yake iliyonse.

32 Mas. 25.14 Pakuti wamphulupulu anyansa Yehova;

koma chinsinsi chake chili ndi oongoka.

33 Zek. 4.3, 4 Yehova atemberera za m'nyumba ya woipa;

koma adalitsa mokhalamo olungama.

34 1Pet. 5.5 Anyozadi akunyoza,

koma apatsa akufatsa chisomo.

35Anzeru adzalandira ulemu cholowa chao;

koma opusa adzakweza manyazi.