MASALIMO 102 - Buku Lopatulika ndilo Mau a Mulungu

Wopsinjika apempha Mulungu achitire anthu ake chifundo, amitundu nammverensoPemphero la Wozunzika, m'mene anakomoka natsanulira cholingalira chake pamaso pa Yehova.

1Yehova, imvani pemphero langa,

ndipo mfuu wanga ufikire Inu.

2 Mas. 27.9 Musandibisire nkhope yanu tsiku la nsautso yanga;

munditchereze khutu lanu;

tsiku limene ndiitana ine mundiyankhe msanga.

3Popeza masiku anga akanganuka ngati utsi,

ndi mafupa anga anyeka ngati nkhuni.

4Mtima wanga ukunga udzu womweta, nufota;

popeza ndiiwala kudya mkate wanga.

5Chifukwa cha liu la kubuula kwanga

mnofu wanga umamatika kumafupa anga.

6Ndikunga vuwo m'chipululu;

ndikhala ngati kadzidzi wa kumabwinja.

7Ndidikira, ndikhala ngati mbalame

ili yokha pamwamba pa tsindwi.

8Adani anga anditonza tsiku lonse;

akundiyalukirawo alumbirira ine.

9Pakuti ndadya mapulusa ngati mkate,

ndi kusakaniza chomwera changa ndi misozi,

10 Mas. 30.7 chifukwa cha ukali wanu ndi kuzaza kwanu;

popeza munandinyamula ndipo munandigwetsa.

11 Mas. 109.23; Yes. 40.6-8 Masiku anga akunga mthunzi womka m'tali;

ndipo ine ndauma ngati udzu.

12Koma Inu, Yehova, mukhalabe kunthawi yonse;

ndi chikumbukiro chanu ku mibadwomibadwo.

13 Yes. 60.10 Inu mudzauka, ndi kuchitira nsoni Ziyoni;

popeza yafika nyengo yakumchitira chifundo, nyengo yoikika.

14Pakuti atumiki anu akondwera nayo miyala yake,

nachitira chifundo fumbi lake.

15 1Maf. 8.43 Pamenepo amitundu adzaopa dzina la Yehova,

ndi mafumu onse a dziko lapansi ulemerero wanu.

16 Yes. 60.1-2 Pakuti Yehova anamanga Ziyoni,

anaoneka mu ulemerero wake;

17 Neh. 1.6, 11 anasamalira pemphero la iwo akusowa konse,

osapepula pemphero lao.

18 Aro. 15.4 Ichi adzachilembera mbadwo ukudza;

ndi mtundu wa anthu umene udalengedwa udzamlemekeza Yehova.

19Pakuti anapenya pansi ali kumwamba kuli malo ake opatulika;

Yehova pokhala kumwamba anapenya dziko lapansi;

20 Mas. 79.11 kuti amve kubuula kwa wandende;

namasule ana a imfa.

21 Mas. 22.22 Kuti anthu alalikire dzina la Yehova mu Ziyoni,

ndi chilemekezo chake mu Yerusalemu;

22Posonkhana pamodzi mitundu ya anthu,

ndi maufumu kuti atumikire Yehova.

23Iye analanda mphamvu yanga panjira;

anachepsa masiku anga.

24 Yes. 38.10 Ndinati, Mulungu wanga, musandichotse pakati pa masiku anga:

Zaka zanu zikhalira m'mibadwomibadwo.

25 Gen. 1.1; 2.1; Aheb. 1.10-12 Munakhazika dziko lapansi kalelo;

ndipo zakumwamba ndizo ntchito ya manja anu.

26 Aheb. 1.10-12 Zidzatha izi, koma Inu mukhala:

Inde, zidzatha zonse ngati chovala;

mudzazisintha ngati malaya, ndipo zidzasinthika:

27 Mala. 3.6; Aheb. 13.8 Koma Inu ndinu yemweyo,

ndi zaka zanu sizifikira kutha.

28 Mas. 69.36 Ana a atumiki anu adzakhalitsa,

ndi mbeu zao zidzakhazikika pamaso panu.