MASALIMO 147 - Buku Lopatulika ndilo Mau a Mulungu

Alemekeze dzina la Mulungu chifukwa cha zokoma amachitira anthu ake

1 Mas. 92.1 Aleluya; Pakuti kuimbira zomlemekeza Mulungu wathu nkokoma;

pakuti chikondweretsa ichi, chilemekezo chiyenera.

2 Deut. 30.3; Yes. 11.12 Yehova amanga Yerusalemu;

asokolotsa otayika a Israele.

3 Yes. 57.15; 61.1 Achiritsa osweka mtima,

namanga mabala ao.

4 Yes. 40.26 Awerenga nyenyezi momwe zili;

azitcha maina zonsezi.

5 Yes. 40.28 Ambuye wathu ndi wamkulu ndi wa mphamvu zambiri;

nzeru yake njosatha.

6 Mas. 146.8-9 Yehova agwiriziza ofatsa;

atsitsira oipa pansi.

7Yamikani Yehova ndi kuthira mang'ombe;

muimbireni Mulungu wathu zomlemekeza pazeze:

8Amene aphimba thambo ndi mitambo,

amene akonzera mvula nthaka,

amene aphukitsa msipu pamapiri.

9 Mas. 145.15; Mat. 6.26 Amene apatsa zoweta chakudya chao,

ana a khwangwala alikulira.

10 Hos. 1.7 Mphamvu ya kavalo siimkonda:

Sakondwera nayo miyendo ya munthu.

11Yehova akondwera nao akumuopa Iye,

iwo akuyembekeza chifundo chake.

12Yerusalemu, lemekezani Yehova;

Ziyoni, lemekezani Mulungu wanu.

13Popeza analimbitsa mipiringidzo ya zitseko zanu:

Anadalitsa ana anu m'kati mwanu.

14 Deut. 32.13-14; Yes. 60.17-18 Ndiye amene akhalitsa malire anu mumtendere;

akukhutitsani ndi tirigu wakucha bwino.

15Atumiza lamulo lake kudziko lapansi;

mau ake athamanga liwiro.

16Apatsa chipale chofewa ngati ubweya;

awaza chisanu ngati phulusa.

17Aponya matalala ake ngati zidutsu:

Adzaima ndani pa kuzizira kwake?

18Atumiza mau ake nazisungunula;

aombetsa mphepo yake, ayenda madzi ake.

19Aonetsa mau ake kwa Yakobo;

malemba ake, ndi maweruzo ake kwa Israele.

20 Aro. 3.1-2 Sanatero nao anthu a mtundu wina;

ndipo za maweruzo ake, sanawadziwe.

Aleluya.