MASALIMO 96 - Buku Lopatulika ndilo Mau a Mulungu

Onse a pansi pano ndi am'mwamba omwe alemekeze Mulungu(1Mbi. 16.23-33)

1 Mas. 33.3 Muimbireni Yehova nyimbo yatsopano;

muimbireni Yehova, inu, dziko lonse lapansi.

2Muimbireni Yehova, lemekezani dzina lake;

lalikirani chipulumutso chake tsiku ndi tsiku.

3Fotokozerani ulemerero wake mwa amitundu;

zodabwitsa zake mwa mitundu yonse ya anthu.

4 Mas. 95.3 Pakuti Yehova ndi wamkulu, nayenera kulemekezedwa kwakukulu;

ayenera amuope koposa milungu yonse.

5Pakuti milungu yonse ya mitundu ya anthu ndiyo mafano,

koma Yehova analenga zakumwamba.

6 Mas. 29.1-2 Pamaso pake pali ulemu ndi ukulu.

M'malo opatulika mwake muli mphamvu ndi zochititsa kaso.

7Mpatseni Yehova, inu, mafuko a mitundu ya anthu,

mpatseni Yehova ulemerero ndi mphamvu.

8Mpatseni Yehova ulemerero wa dzina lake;

bwerani nacho chopereka, ndipo fikani kumabwalo ake.

9 Mas. 29.1-2 Gwadirani Yehova moyera ndi mokometsetsa,

njenjemerani pamaso pake, inu dziko lonse lapansi.

10 Mas. 93.1 Nenani mwa amitundu, Yehova achita ufumu;

dziko lokhalamo anthu lomwe likhazikika kuti silingagwedezeke;

adzaweruza mitundu ya anthu molunjika.

11 Mas. 69.34 Kumwamba kukondwere nilisekerere dziko lapansi;

nyanja ibume mwa kudzala kwake.

12Munda ukondwerere ndi zonse zili m'mwemo;

pamenepo mitengo yonse ya kunkhalango idzafuula mokondwera.

13 Mas. 67.4 Pamaso pa Yehova, pakuti akudza;

pakuti akudza kudzaweruza dziko lapansi

Adzaweruza dziko lokhalamo anthu ndi chilungamo,

ndi mitundu ya anthu ndi choonadi.