MASALIMO 135 - Buku Lopatulika ndilo Mau a Mulungu

Mulungu alemekezedwa pa ukulu wake. Mafano ndi achabe

1 Aleluya; Lemekezani dzina la Yehova!

Lemekezani inu atumiki a Yehova.

2 Luk. 2.37 Inu akuimirira m'nyumba ya Yehova,

m'mabwalo a nyumba ya Mulungu wathu.

3 Mas. 119.68 Lemekezani Yehova; pakuti Yehova ndiye wabwino;

muimbire zolemekeza dzina lake; pakuti nkokondweretsa kutero.

4 Eks. 19.5 Pakuti Yehova anadzisankhira Yakobo,

Israele, akhale chuma chake chenicheni.

5Pakuti ndidziwa kuti Yehova ndi wamkulu,

ndi Ambuye wathu aposa milungu yonse.

6 Mas. 115.3 Chilichonse chimkonda Yehova achichita,

kumwamba ndi padziko lapansi, m'nyanja ndi mozama monse.

7Akweza mitambo ichokere ku malekezero a dziko lapansi;

ang'animitsa mphezi zidzetse mvula;

atulutsa mphepo mosungira mwake.

8 Eks. 12.12, 29 Anapanda oyamba a Ejipito,

kuyambira munthu kufikira zoweta.

9 Eks. 7.10 Anatumiza zizindikiro ndi zodabwitsa pakati pako, Ejipito iwe,

pa Farao ndi pa omtumikira onse.

10 Num. 21.24-35 Ndiye amene anapanda amitundu ambiri,

napha mafumu amphamvu;

11Sihoni mfumu ya Aamori,

ndi Ogi mfumu ya Basani,

ndi maufumu onse a Kanani:

12Ndipo anapereka dziko lao likhale cholowa,

cholowa cha kwa Israele anthu ake.

13 Eks. 3.15 Dzina lanu, Yehova, likhala kosatha;

chikumbukiro chanu, Yehova, kufikira mibadwomibadwo.

14 Deut. 32.36 Pakuti Yehova adzaweruza anthu ake,

koma adzaleka atumiki ake.

15 Mas. 115.4-10 Mafano a amitundu ndiwo siliva ndi golide,

ntchito ya manja a anthu.

16Pakamwa ali napo koma osalankhula;

maso ali nao, koma osapenya;

17makutu ali nao, koma osamva;

inde, pakamwa pao palibe mpweya.

18Akuwapanga adzafanana nao;

inde, onse akuwakhulupirira.

19A nyumba ya Israele inu, lemekezani Yehova:

A nyumba ya Aroni inu, lemekezani Yehova:

20A nyumba ya Levi inu, lemekezani Yehova:

Inu akuopa Yehova, lemekezani Yehova.

21Alemekezedwe Yehova kuchokera mu Ziyoni,

amene akhala mu Yerusalemu.

Aleluya.