MASALIMO 101 - Buku Lopatulika ndilo Mau a Mulungu

Davide akuti adzasamala okhulupirika nadzachotsa oipaSalimo la Davide.

1 Mas. 89.1 Ndidzaimba zachifundo ndi chiweruzo;

ndidzaimba zakukulemekezani Inu, Yehova.

2 1Maf. 9.4 Ndidzachita mwanzeru m'njira yangwiro;

mudzandidzera liti?

Ndidzayenda m'nyumba mwanu ndi mtima wangwiro.

3 Mas. 97.10 Sindidzaika chinthu choipa pamaso panga;

chochita iwo akupatuka padera chindiipira;

sichidzandimamatira.

4Mtima wopulukira udzandichokera;

sindidzadziwana naye woipa.

5 Mas. 15.3; Miy. 6.17 Wakuneneza mnzake m'tseri ndidzamdula;

wa maso odzikuza ndi mtima wodzitama sindidzamlola.

6Maso anga ayang'ana okhulupirika m'dziko, kuti akhale ndi Ine;

iye amene ayenda m'njira yangwiro, iyeyu adzanditumikira Ine.

7 Mas. 120.2 Wakuchita chinyengo sadzakhala m'kati mwa nyumba yanga;

wakunena mabodza sadzakhazikika pamaso panga.

8 Yer. 21.12 Mamawa onse ndidzadula oipa onse a m'dziko;

kuduliratu onse akuchita zopanda pake kumzinda wa Yehova.