YOBU 24 - Buku Lopatulika ndilo Mau a Mulungu

1 Mac. 1.7 Wamphamvuyonse alekeranji kuikiratu nyengo?

Ndi iwo omdziwa alekeranji kudziwa masiku ake?

2 Deut. 19.14 Alipo akusendeza malire;

alanda gulu la zoweta, nazidyetsa.

3 Deut. 24.17 Akankhizira kwao bulu wa amasiye,

atenga ng'ombe ya mfedwa ikhale chikole.

4Apatukitsa aumphawi m'njira;

osauka a padziko abisala pamodzi.

5Taonani, ngati mbidzi za m'chipululu

atulukira kuntchito zao, nalawirira nkufuna chakudya;

chipululu chiwaonetsera chakudya cha ana ao.

6Atema dzinthu zao m'munda;

natola khunkha m'munda wampesa wa woipa.

7 Deut. 24.12-13 Agona amaliseche usiku wonse opanda chovala,

alibe chofunda pachisanu.

8Avumbwa ndi mvula kumapiri,

nafukata thanthwe posowa pousapo.

9Akwatula wamasiye kubere,

natenga chikole chovala cha osauka;

10momwemo ayenda amaliseche opanda chovala,

nasenza mtolo wa dzinthu ali ndi njala.

11M'kati mwa malinga a iwo aja ayenga mafuta;

aponda mphesa moponderamo, namva ludzu.

12M'mzinda waukulu anthu abuula alinkufa;

ndi moyo wa iwo olasidwa ufuula;

koma Mulungu sasamalira choipacho.

13Iwo ndiwo amene apikisana nako kuunika,

sadziwa njira zake, Sasunga mayendedwe ake.

14 Mas. 10.8 Kukacha auka wambanda, napha wosauka ndi waumphawi;

ndi usiku asanduka mbala.

15 Miy. 7.9-10 Ndipo diso la wachigololo liyembekezera chisisira,

ndi kuti, Palibe diso lidzandiona;

navala chophimba pankhope pake.

16 Yoh. 3.20 Kuli mdima aboola nyumba,

usana adzitsekera,

osadziwa kuunika.

17Pakuti iwo onse auyesa m'mawa mthunzi wa imfa;

pakuti adziwa zoopsa za mthunzi wa imfa.

18Atengedwa ngati choyandama pamadzi;

gawo lao litembereredwa padziko;

sadzalunjikanso njira ya minda yampesa.

19Chilala ndi dzuwa zitha madzi a chipale chofewa,

momwemo manda achita nao ochimwa.

20 Miy. 10.7 M'mimba mudzamuiwala;

mphutsi zidzamudya mokondwera.

Sadzamkumbukiranso;

ndipo chosalungama chidzathyoledwa ngati mtengo.

21Alusira chumba wosabala,

osamchitira wamasiye chokoma.

22Mulungu awakhalitsa amphamvu mwa mphamvu yake;

iwo aukanso m'mene anayesa kuti sadzakhala ndi moyo.

23 Miy. 15.3 Awalola akhale osatekeseka, ndipo alimbikapo;

koma maso ake ali panjira zao.

24Akwezeka; m'kamphindi kuli zii;

inde atsitsidwa, achotsedwa monga ena onse,

adulidwa ngati tirigu ngala zake.

25Ndipo ngati si kutero, anditsutsa ndani kuti ndili wabodza,

ndi kuyesa mau anga opanda pake?