MASALIMO 99 - Buku Lopatulika ndilo Mau a Mulungu

Mulungu wamkulu wachifundo alemekezedwe

1 Eks. 25.22 Yehova ndiye mfumu; mitundu ya anthu injenjemere;

Iye akhala pakati pa akerubi; dziko lapansi ligwedezeke.

2Yehova ndiye wamkulu mu Ziyoni;

ndipo akwezeka pamwamba pa mitundu yonse ya anthu.

3 Deut. 28.58 Alemekeze dzina lanu lalikulu ndi loopsa.

Ili ndilo loyera.

4 Yes. 61.8 Ndipo mphamvu ya mfumu ikonda chiweruzo;

Inu mukhazikitsa zolunjika,

muchita chiweruzo ndi chilungamo mu Yakobo.

5 1Mbi. 28.2 Mkwezeni Yehova Mulungu wathu,

ndipo gwadirani poponderapo mapazi ake:

Iye ndiye Woyera.

6 Eks. 14.15; 1Sam. 7.9 Mwa ansembe ake muli Mose ndi Aroni,

ndi Samuele mwa iwo akuitanira dzina lake;

anaitana kwa Yehova, ndipo Iye anawayankha.

7 Eks. 33.9 Iye analankhula nao mu mtambo woti njo:

Iwo anasunga mboni zake ndi malembawa anawapatsa.

8 Num. 14.20 Munawayankha, Yehova Mulungu wathu:

munawakhalira Mulungu wakuwakhululukira,

mungakhale munabwezera chilango pa zochita zao.

9 Yes. 6.3 Mkwezeni Yehova Mulungu wathu,

ndipo gwadirani paphiri lake loyera;

pakuti Yehova Mulungu wathu ndiye woyera.