MASALIMO 72 - Buku Lopatulika ndilo Mau a Mulungu

Za ufumu wa Mfumu yokomaSalimo la Solomoni.

1Patsani mfumu maweruzo anu, Mulungu,

ndi mwana wa mfumu chilungamo chanu.

2 Yes. 11.2-4 Potero adzanenera anthu anu mlandu ndi m'chilungamo,

ndi ozunzika anu ndi m'chiweruzo.

3 Yes. 52.7 Mapiri adzatengera anthu mtendere,

timapiri tomwe, m'chilungamo.

4Adzaweruza ozunzika a mwa anthu,

adzapulumutsa ana aumphawi,

nadzaphwanya wosautsa.

5 Mas. 89.36-37 Adzakuopani momwe likhalira dzuwa ndi mwezi,

kufikira mibadwomibadwo.

6 Hos. 6.3 Adzanga mvula yakugwa pa udzu wosenga,

monga mvula yothirira dziko.

7 Yes. 2.4 Masiku ake wolungama adzakhazikika;

ndi mtendere wochuluka, kufikira sipadzakhala mwezi.

8 1Maf. 4.21, 24; Zek. 9.10 Ndipo adzachita ufumu kuchokera kunyanja kufikira kunyanja,

ndi kuchokera ku Mtsinje kufikira malekezero a dziko lapansi.

9 Yes. 49.23 Okhala m'chipululu adzagwadira pamaso pake;

ndi adani ake adzaluma nthaka.

10 Yes. 60.6, 9 Mafumu a ku Tarisisi ndi ku Zisumbuzo adzabwera nacho chopereka;

mafumu a ku Sheba ndi Seba adzadza nazo mphatso.

11 Yes. 49.22-23 Inde mafumu onse adzamgwadira iye,

amitundu onse adzamtumikira.

12 Mas. 35.10 Pakuti adzapulumutsa waumphawi wofuulayo;

ndi wozunzika amene alibe mthandizi.

13Adzachitira nsoni wosauka ndi waumphawi,

nadzapulumutsa moyo wa aumphawi.

14 Mas. 116.15 Adzaombola moyo wao ku chinyengo ndi chiwawa;

ndipo mwazi wao udzakhala wa mtengo pamaso pake.

15Ndipo iye adzakhala ndi moyo;

ndipo adzampatsa golide wa ku Sheba;

nadzampempherera kosalekeza;

adzamlemekeza tsiku lonse.

16M'dzikomo mudzakhala dzinthu dzochuluka

pamwamba pa mapiri;

zipatso zake zidzati waa, ngati za ku Lebanoni,

ndipo iwo a m'mizinda adzaphuka ngati msipu wapansi.

17 Gen. 22.18; Mas. 89.36 Dzina lake lidzakhala kosatha,

momwe likhalira dzuwa dzina lake lidzamvekera zidzukulu.

Ndipo anthu adzadalitsidwa mwa Iye;

amitundu onse adzamutcha wodala.

18 Mas. 77.14 Wolemekezeka Yehova Mulungu, Mulungu wa Israele,

amene achita zodabwitsa yekhayo.

19 Neh. 9.5; Zek. 14.9 Ndipo dzina lake la ulemerero lidalitsike kosatha;

ndipo dziko lonse lapansi lidzale nao ulemerero wake.

Amen, ndi Amen.

20Mapemphero a Davide mwana wa Yese atha.