MASALIMO 71 - Buku Lopatulika ndilo Mau a Mulungu

Nkhalamba idzaponya kwa Mulungu amene anamkhulupirira kuyambira ubwana wake

1 Mas. 31.1-3; 25.2-3 Ndikhulupirira Inu, Yehova.

Ndisachite manyazi nthawi zonse.

2Ndikwatuleni m'chilungamo chanu, ndi kundilanditsa,

nditcherereni khutu lanu ndi kundipulumutsa.

3Mundikhalire thanthwe lokhalamo, lopitako kosaleka;

mwalamulira kundipulumutsa;

popeza Inu ndinu thanthwe langa ndi linga langa.

4 Mas. 140.1, 4 Ndilanditseni, Mulungu wanga, m'dzanja la woipa,

m'dzanja la munthu wosalungama ndi wachiwawa.

5 Yes. 17.7, 13 Pakuti Inu ndinu chiyembekezo changa, Ambuye Yehova;

mwandikhalira wokhulupirika kuyambira ubwana wanga.

6 Yes. 46.3 Inu munandigwiriziza kuyambira ndisanabadwe,

kuyambira pa thupi la mai wanga wondichitira zokoma ndinu;

ndidzakulemekezani kosalekeza.

7 Yes. 8.18 Ndikhala chodabwitsa kwa ambiri;

koma Inu ndinu pothawira panga polimba.

8 Mas. 35.28 M'kamwa mwanga mudzadzala lemekezo lanu,

ndi ulemu wanu tsiku lonse.

9 Mas. 71.18 Musanditaye mu ukalamba wanga;

musandisiye, pakutha mphamvu yanga.

10 2Sam. 17.1; Mat. 27.1 Pakuti adani anga alankhula za ine;

ndipo iwo akulalira moyo wanga apangana upo,

11ndi kuti, Wamsiya Mulungu.

Mlondoleni, mgwireni; popeza palibe wompulumutsa.

12 Mas. 70.1 Musandikhalire kutali, Mulungu;

fulumirani kundithandiza, Mulungu.

13Adani a moyo wanga achite manyazi, nathawe;

chotonza ndi chimpepulo zikute ondifunira choipa.

14Koma ine ndidzayembekeza kosaleka,

ndipo ndidzaonjeza kukulemekezani.

15 Mas. 71.8, 24 Pakamwa panga padzafotokozera chilungamo chanu,

ndi chipulumutso chanu tsiku lonse;

pakuti sindidziwa mawerengedwe ake.

16Ndidzamuka mu mphamvu ya Ambuye Yehova;

ndidzatchula chilungamo chanu, inde chanu chokha.

17Mulungu, mwandiphunzitsa kuyambira ubwana wanga;

ndipo kufikira lero ndilalikira zodabwitsa zanu.

18 Mas. 71.9 Poteronso pokalamba ine ndi kukhala nazo imvi musandisiye, Mulungu;

kufikira nditalalikira mbadwo uwu za dzanja lanu,

mphamvu yanu kwa onse akudza m'mbuyo.

19 Mas. 86.8 Chilungamo chanunso, Mulungu, chifikira kuthambo;

Inu amene munachita zazikulu,

akunga Inu ndani, Mulungu?

20 Hos. 6.1-2 Inu, amene munationetsa nsautso zambiri ndi zoipa,

mudzatipatsanso moyo,

ndi kutitenganso munsi mwa dziko.

21Mundionjezere ukulu wanga,

ndipo munditembenukire kundisangalatsa.

22 Mas. 92.1-3; Yes. 60.9 Ndiponso ndidzakuyamikani ndi chisakasa,

kubukitsa choonadi chanu, Mulungu wanga;

ndidzakuimbirani nyimbo ndi zeze,

ndinu Woyerayo wa Israele.

23 Mas. 103.4 Milomo yanga idzafuula mokondwera poimbira Inu nyimbo;

inde, moyo wanga umene munaombola.

24 Mas. 71.8, 13, 15 Lilime langa lomwe lidzalankhula za chilungamo chanu tsiku lonse,

pakuti ofuna kundichitira choipa achita manyazi, nadodoma.