MIYAMBO 1 - Buku Lopatulika ndilo Mau a Mulungu

Zochitira miyambo

1 1Maf. 4.32; Mlal. 12.9 Miyambo ya Solomoni mwana wa Davide, mfumu ya Israele.

2Kudziwa nzeru ndi mwambo;

kuzindikira mau ozindikiritsa;

3kulandira mwambo wakusamalira machitidwe,

chilungamo, chiweruzo ndi zolunjika;

4kuchenjeza achibwana,

kuphunzitsa mnyamata kudziwa ndi kulingalira;

5 Miy. 9.9 kuti wanzeru amve, naonjezere kuphunzira;

ndi kuti wozindikira afikire kuuphungu;

6kuzindikira mwambi ndi tanthauzo lake,

mau a anzeru, ndi zophiphiritsa zao.

Munthu asalole oipa amchete

7 Miy. 9.10 Kuopa Yehova ndiko chiyambi cha kudziwa;

opusa anyoza nzeru ndi mwambo.

8 Aef. 6.1, 2 Mwananga, tamva mwambo wa atate wako,

ndi kusasiya chilangizo cha amai ako;

9pakuti izi ndi korona wa chisomo pamutu pako,

ndi mkanda pakhosi pako.

10 Gen. 39.7-8 Mwananga, akakukopa ochimwa usalole.

11 Yes. 5.26 Akanena, Idza nafe, tibisalire mwazi,

tilalire osachimwa opanda chifukwa;

12tiwameze ali ndi moyo ngati manda,

ali amphumphu, ngati akutsikira kudzenje;

13tidzapeza chuma chonse cha mtengo wake,

tidzadzaza nyumba zathu ndi zofunkha;

14udzachita nafe maere,

tonse tidzakhala ndi chotengeramo chimodzi.

15 Mas. 1.1 Mwananga, usayende nao m'njira;

letsa phazi lako ku mayendedwe ao;

16 Yes. 59.7 pakuti mapazi ao athamangira zoipa,

afulumira kukhetsa mwazi.

17Pakuti kutchera msampha pamaso pa mbalame ndi chabe;

18ndipo awa abisalira mwazi waowao, alalira miyoyo yaoyao.

19 1Tim. 6.10 Mayendedwe a yense wopindula chuma monyenga ngotere;

chilanda moyo wa eni ake.

Chenjezo la Nzeru

20Nzeru ifuula panja;

imveketsa mau ake pabwalo;

21iitana posonkhana anthu polowera pachipata;

m'mzinda inena mau ake,

22Kodi mudzakonda zazibwana kufikira liti, achibwana inu?

Onyoza ndi kukonda kunyoza,

opusa ndi kuda nzeru?

23 Yow. 2.28 Tembenukani pamene ndikudzudzulani;

taonani, nditsanulira pa inu mzimu wanga,

ndikudziwitsani mau anga.

24 Yes. 66.4 Chifukwa ndaitana, ndipo munakana;

ndatambasula dzanja langa,

ndipo panalibe analabadira;

25 Luk. 7.30 koma munapeputsa uphungu wanga wonse,

ndi kukana kudzudzula kwanga.

26 Mas. 2.4 Inetu ndidzachitira chiphwete tsoka lanu,

ndidzatonyola pakudza mantha anu;

27pakudza mantha anu ngati mphepo yopasula,

ndi pofika tsoka lanu ngati kamvulumvulu;

pakudza kwa inu vuto ndi nsautso.

28 Yer. 11.11; Yak. 4.3 Pamenepo adzandiitana,

koma sindidzavomera;

adzandifunatu, osandipeza ai;

29 Mas. 119.173 chifukwa anada nzeru,

sanafune kuopa Yehova;

30anakana uphungu wanga,

nanyoza kudzudzula kwanga konse;

31 Yes. 3.11; Agal. 6.7 momwemo adzadya zipatso za mayendedwe ao,

nadzakhuta zolingalira zao.

32Pakuti kubwerera m'mbuyo kwa achibwana kudzawapha;

ndipo mphwai za opusa zidzawaononga.

33 Mas. 25.12-13 Koma wondimvera ine adzakhala osatekeseka,

nadzakhala phee osaopa zoipa.