MASALIMO 10 - Buku Lopatulika ndilo Mau a Mulungu

Athamangira Mulungu pothawa adani omtsata

1Muimiranji patali, Yehova?

Mubisaliranji m'nyengo za nsautso?

2 Mas. 7.16 Podzikuza woipa apsereza waumphawi;

agwe m'chiwembu anapanganacho.

3 Mas. 94.4 Pakuti woipa adzitamira chifuniro cha moyo wake,

adalitsa wosirira, koma anyoza Yehova.

4 Mas. 14.2 Woipa, monga mwa kudzikuza kwa nkhope yake, akuti, Sadzafunsira.

Malingaliro ake onse akuti, Palibe Mulungu.

5Mayendedwe ake alimbika nthawi zonse;

maweruzo anu ali pamwamba posaona iye;

adani ake onse awanyodola.

6Ati mumtima mwake, Sindidzagwedezeka ine;

ku mibadwomibadwo osagwa m'tsoka ine.

7 Mas. 12.2 M'kamwa mwake mwadzala kutemberera

ndi manyengo ndi kuchenjerera;

pansi pa lilime lake pali chivutitso chopanda pake.

8 Mas. 17.11, 12 Akhala m'molalira midzi;

mobisalamo akupha munthu wosachimwa.

Ambisira waumphawi nkhope yake.

9Alalira monga mkango m'ngaka mwake;

alalira kugwira wozunzika,

agwira wozunzika, pakumkola mu ukonde mwake.

10Aunthama, nawerama,

ndipo aumphawi agwa m'zala zake.

11Anena m'mtima mwake, Mulungu waiwala;

wabisa nkhope yake; sapenya nthawi zonse.

12Ukani, Yehova; samulani dzanja lanu, Mulungu;

musaiwale ozunzika.

13Woipa anyozeranji Mulungu,

anena m'mtima mwake, Simudzafunsira?

14 Mas. 68.5; 2Tim. 1.12 Mwapenya; pakuti mumayang'anira chivutitso

ndi chisoni kuti achipereke m'manja mwanu;

waumphawi adzipereka kwa Inu;

wamasiye mumakhala mthandizi wake.

15 Mas. 37.17 Thyolani mkono wa woipa;

ndipo wochimwa, mutsate choipa chake

kufikira simuchipezanso china.

16 Yer. 10.10 Yehova ndiye Mfumu kunthawi yamuyaya;

aonongeka amitundu m'dziko lake.

17Yehova, mwamva chikhumbo cha ozunzika,

mudzakhazikitsa mtima wao, mudzatchereza khutu lanu;

18 Yes. 1.17 kuti muweruze mlandu wa amasiye ndi wokhalira mphanthi,

kuti munthu wa padziko lapansi angaonjeze kuopsa.