MASALIMO 111 - Buku Lopatulika ndilo Mau a Mulungu

Alemekeza Mulungu pa ntchito zao zazikulu zokoma

1 Mas. 35.18 Aleluya.

Ndidzayamika Yehova ndi mtima wonse,

mu upo wa oongoka mtima, ndi mumsonkhano.

2 Mas. 143.5 Ntchito za Yehova nzazikulu,

zofunika ndi onse akukondwera nazo.

3Chochita Iye ncha ulemu, ndi ukulu:

Ndi chilungamo chake chikhalitsa kosatha.

4 Mas. 103.8 Anachita chokumbukitsa zodabwitsa zake;

Yehova ndiye wachisomo ndi nsoni zokoma.

5 Mat. 6.26, 33 Anapatsa akumuopa Iye chakudya;

adzakumbukira chipangano chake kosatha.

6Anaonetsera anthu ake mphamvu ya ntchito zake,

pakuwapatsa cholowa cha amitundu.

7 Mas. 19.9 Ntchito za manja ake ndizo choonadi ndi chiweruzo;

malangizo ake onse ndiwo okhulupirika.

8 Mat. 5.18 Achirikizika kunthawi za nthawi,

achitika m'choonadi ndi chilunjiko.

9 Mat. 1.21; Luk. 1.49 Anatumizira anthu ake chipulumutso;

analamulira chipangano chake kosatha;

dzina lake ndilo loyera ndi loopedwa.

10 Deut. 4.5-6; Miy. 1.7 Kumuopa Yehova ndiko chiyambi cha nzeru;

onse akuchita chotero ali nacho chidziwitso chokoma;

chilemekezo chake chikhalitsa kosatha.