APOCALIPSIS 21 - Biblia Quichua Cañar 2010

Jahua pachapish, cai pachapish mushuc tucushcamanta

1Chai quipaca ñaupaman cac jahua pachapish, cai pachapish shinallatac mama cucha yacupish chingaricpica, jahua pachatapish, cai pachatapish mushuc cashcatami ricurcani.

2Shinallatac jahua pacha Diospac ñaupamanta Diospaclla cac mushuc Jerusalén pueblo, novia cusahuan tupangapac allichirishca shina urai shamucuctami ricurcani.

3Mandashpa tiyarinamanta sinchita shuc rimashca uyarishpaca: «Cunanca Diospac carpa huasica gentecunapac chaupipimi causacun. Paicunahuanmi tucui causaipi causanga. Paicunaca Diospac huahuami canga. Diosllatacmi paicunahuanca causanga.

4Paica tucui huiquitami ñahuicunamantaca pichanga. Huañuipish, llaquilla canapish, huacaicunapish, nanaicunapish ña mana tiyangachu. Ñaupaman ima tiyashcapish cunanca ña mana tiyangachu» nirca.

5Chai quipaca mandashpa tiyarinapi tiyacucca: «Ñucaca tucuitami mushucta ruhuani» nirca. Shinallatac paica: «Quillcai, cai ñuca rimashcacunaca chashna pactanatac, shinallatac mana llullachu» nirca.

6Chai quipaca ñucataca: «¡Ñami tucui pactachishca! Ñucaca callari A shina, tucuri Z shinami tucuita callarichicpish, tucuchicpish cani. Maijanpish yacunayaita charicmanca, huiñai causaita cuc tucyacuc yacutami yanga ubiachisha.

7Maijanpish millaita mishacca pai japina cashcatami japinga. Ñucaca paipac Diosmi casha, shinallatac paipish ñucapac huahuami canga.

8Ashtahuanpish manchaccunaca, mana criccunaca, millaicunaca, huañuchiccunaca, huainayaccunaca, brujiaccunaca, ruhuashcalla dioscunata adoraccunaca, shinallatac tucui llullaccunaca azufrehuan rupacuc nina cuchapimi shitashca canga. Chaica quipa huañuimi can» nirca.

Mushuc Jerusalenmanta

9Chai quipaca canchis tucurina llaquicunata copapi charicuc, chai canchis angelcunapuramanta shuc ángel shamushpami ñucataca: «Shamui, Pactalla Ovejapac huarmi cana novia allichishcata ricuchisha» nirca.

10Diospac Espíritu ñucata japicpimi chai angelca shuc jatun urcu jahuaman pushashpa, jahua pacha Diospac ñaupamanta Diospaclla cac Jerusalén pueblo urai shamucucta ricuchirca.

11Chai puebloca Diospac sumaimana achiclla cashcahuanmi jagan nicurca. Valishca jaspe rumi shina, vidrio shina jagan nicucmi carca.

12Chai pueblo muyundictaca jahuacaman jarcashca, chunga ishcai pungutami charirca. Tucui chai pungucunapimi shuc ángel carca. Shinallatac pungucunapica Israelpac chunga ishcai aillucunamanta shuc aillupac shutita quillcashcami carca.

13Quimsa punguca inti llucshic ladoman, quimsa punguca inti yaicuc ladoman, quimsa punguca ura ladoman, cutin quimsa punguca jahua ladomanmi carca.

14Chai pueblota jarcac callari pircaca, chunga ishcai rumicuna jahuapimi carca. Chai rumicunapica, Pactalla Ovejapac chunga ishcai acllashca huillaccunapac shuticunami quillcashca carca.

15Ñucahuan parlanacuc angelca pueblotapish, pungucunatapish, muyundi jarcashcatapish medina curi varatami charicurca.

16Chai puebloca sunimanpish, anchomanpish chai shinallatacmi carca. Ángel varahuan medishpaca, ishcai huaranga ishcai pasac kilometrotami llucchirca. Sunimanpish, anchomanpish, jahuamanpish chai shinallatacmi carca.

17Shinallatac muyundi jarcashcata medishpaca, gentecuna medishca shinallatacmi sucta chunga pichca metrota llucchirca.

18Chai muyundi pircashcaca jaspe rumihuanmi pircashca carca. Cutin chai puebloca llambuclla vidrio shina curimanta ruhuashcami carca.

19Chai pueblota jarcac callari pircacunaca tucuilaya valishca rumicunahuanmi allichishca carca. Shucniquipica jaspe, ishcainiquipica zafiro, quimsaniquipica ágata, chuscuniquipica esmeralda,

20pichcaniquipica ónice, suctaniquipica cornalina, canchisniquipica crisólito, pusacniquipica berilo, iscunniquipica topacio, chunganiquipica crisopraso, chunga shucniquipica jacinto, shinallatac chunga ishcainiquipica amatista rumimi carca.

21Chai chunga ishcai pungucunaca chunga ishcai perlacunami carca. Cada pungumi shuclla perlasmanta ruhuashca carca. Chai pueblopi cac jatun ñanca llambuclla vidrio shina curimanta ruhuashcami carca.

22Chai pueblopica tucui poderta charic Mandac Diospish, shinallatac Pactalla Ovejapish Diosta mañana huasi shina cashcamantami, chaipica Diosta mañana huasitaca mana ricurcani.

23Chai pueblotaca Dios pai sumaimana cashcahuan, shinallatac Pactalla Oveja lámpara shina achicyachicucpimi, intipish, quillapish achicyachingapacca mana tiyana carca.

24Chai pueblo achicyachicpimi, tucui llactacunapi causaccunaca achicpi puringacuna. Shinallatac cai pachapi causac jatun mandaccunapish tucui ima charishcacunatami chaimanca apangacuna.

25Chai pueblopi tuta mana tiyacpi punzhalla cacpimi, pungucunapish jaicapi mana huichcaringa.

26Chaimanca tucui llactacunamantami ima sumaccunatapish, ima charishcacunatapish apangacuna.

27Chai pueblomanca juchayuccunapish, millaita ruhuaccunapish, llullaccunapish mana yaicungachu. Ashtahuanpish Pactalla Oveja charicuc, huiñaita causangapac rina libropi shutita quillcachishcacunallami yaicunga.