JEREMÍAS 37 - Biblia Quichua Cañar 2010

Jeremías Diosta mañashcamanta

1Babilonia llactata jatun mandac Nabucodonosormi Josiaspac churi Sedequiasta Judá llactata jatun mandachun churarca. Paica Joacimpac churi Coniaspac randimi mandarca.

2Ashtahuanpish Mandac Dios Jeremiasman huillachishcataca Sedequiaspish, paita serviccunapish, chai llacta gentecunapish mana cazurcachu.

3Jatun mandac Sedequías Selemiaspac churi Jucalta, Maasiaspac churi Sofonías curata Dios ima nishcata huillac Jeremiaspacman cachashpaca: «Ñucanchicmanta ñucanchicta Mandac Diosta mañaiyari» nichunmi cacharca.

4Jeremiastaca manarac prezurcachu. Chaimantami paica gentecunapac chaupipi llucshic yaicuc puricurca.

5Faraonpac soldadocunami Egiptomanta llucshimushca carca. Chaita Jerusalenta muyunacushpa chapacuc caldeocuna yachai chayashpami, chaimanta anchurishpa rirca.

6Mandac Dios Jeremiasta rimashpaca:

7«Israelcunata Mandac Dios ñucaca cancunata ñucaman tapuchun cachac Judá llactata jatun mandactaca: “Cancunata ayudangapac shamuc Faraonpac soldadocunaca Egiptollamantac cuti rigrinmi.

8Chashna ricpimi, caldeocunaca cutinllatac cai llactaman cutishpa, macanacushpa rupachinga.

9Mandac Dios ñucaca: Ama cancunapac shungupi: ‘Caldeocunaca caimanta anchuringacunallami’ nishpa yanga cushicuichicchu. Paicunaca manatac anchuringacunachu.

10Cancunahuan macanacucuc caldeocunata cancuna tucuita aticpi, maijan soldadocunalla paicunapac carpa huasicunapi chugririshca saquirishpapish cai llactataca ninata churashpa tucuchingami” ninmi ningui» nirca.

Jeremiasta prezushcamanta

11Faraonpac soldadocuna shamucucta caldeo soldadocuna yachac chayashpa, Jerusalén ladomanta anchuricucpimi,

12Jeremiasca gentecunamanta caruyangapac Jerusalenmanta Benjamín llactaman rirca.

13Jeremías Benjamín pungu nishcaman chayacpica, soldadocunata mandac Iriasmi cuidacurca. Paica Selemiaspac churi Hananiaspac nietomi carca. Paimi Dios ima nishcata huillac Jeremiastaca: «¡Canca, caldeocunapacmanmi ricungui!» nishpa prezurca.

14Ashtahuanpish Jeremiasca: «Mana caldeocunapacman ricunichu. ¡Yangami nicungui!» nirca. Shina nicpipish, Iriasca mana uyashpami, Jeremiastaca mandaccunapacman aparca.

15Mandaccunaca yallita piñarishpami, Jeremiastaca macashpa, quillcac Jonatanpac huasipi prezu churarca. Chai huasitaca carceltami ruhuarca.

16Chai huasipimi Jeremiastaca pambata jutcushca ucupi prezu churarca. Chaipica tauca punzhacunatami carca.

17Jatun mandac Sedequías Jeremiasta carcelmanta llucchimushpa, paipac huasipi pacalla tapushpaca:

—¿Mandac Dios ima nishcata chasquircanguichu?— nirca.

Shina tapucpimi Jeremiasca:

—Ari, chasquircanimi. Babilonia llactata jatun mandacpac maquipimi churashca cagringui— nirca.

18Shinallatac Jeremiasca jatun mandac Sedequiastaca:

—Ñucata carcelpi churachunca, ¿ima mana allitatac cantapish, canta serviccunatapish, cai gentecunatapish, ruhuarcaniyari?

19¿Maipitac cancunaman: “Babilonia llactata jatun mandacca cancunatapish, cai llactatapish mana llaquichingapac shamungachu” nishpa huillacca?

20Jatun mandac ñuca amolla, ñuca mañashcata uyaiyari. Ñucaca quillcac Jonatanpac huasipi huañunataca mana munanichu. Ama chaiman cutin cachaichu— nirca.

21Shina nicpimi, jatun mandac Sedequiasca Jeremiasta cárcel canzha pambapi churashpa cuidachun, shinallatac chai llactapi tucui tanda tucuringacaman callepi ruhuashca tandata apamushpa punzhanta carachun mandarca. Shinami Jeremiasca cárcel canzha pambapi tiyacurca.